Sulisitsisut: SIK uniorujussuarpoq
Sulisitsisut peqatigiiffiat nunani allamiut suliartortinneqarnissaat pillugu oqallinnermut akulerupput. Oqallinneq SIK'p qassimiuaartitsinerani aallartippoq, tassani sulisartut siulittaasuata Jess G. Berthelsenip nunani allamiut sulisorineqarnissaat pillugu isornartorsiuimmat.
- Sulisitsisut peqatigiiffiata SIK'p siulittaasuata Jess G. Berthelsenip ilaasortami suliffeqalernissaannut sorsuutiginninnera iluarisimaartupilussuuaat. Siulittaasorli uniorujussuarpoq suliffissaaleqinerujussuarmut kommunit ataasiakkaat, assigiinnik suliaqarfiit suliffeqarfiillu nunani allamiunit sulisussarsisariaqarsimasut akisussaatikkunigit, Sulisitsisut peqatigiiffiata pisortaa Brian Buus Pedersen tusagassiuutinut allaaserisaqarluni nalunaarpoq.
Aamma atuaruk SIK Sermersoorlu tikkuartaattut
Pisortaq naapertorlugu pisortat sanaartorfiini pilersaarusiornerlunnerup sunniivigeqatigiinnermi ilusilersuinermilu ajornartorsiuteqarnerup kalaallit suliffeqarfiini nunani allamiunik sulisoqarnissaq pisariaqalersittarpaa.
- Suliffissaaleqisumut amerlasuutigut sulineq imminut akilersinnaatinnagu, suliffissamullu naaggaarneq kinguneqartinneqartartinnagu, pilersaarusiornerlunnerup sunniivigeqatigiinnermi- ilusilersuinermilu ajornartorsiuteqarneq ingerlajuassasoq Brian Buus Pedersen taama allappoq.
Taassuma akisussaaffik Naalakkersuisunut Inatsisartunullu inissippaa, isumaqarami pimoorussilluni suliffeqarfinnut- isumaginninnerullu iluani iluarsaasseqqittariaqartut.