Sulisitsisut: Oqartussat akuleruppata kingunerlussinnaavoq

Taama oqarput, Sermitsiap aaqqissuisuunera Poul Krarup aamma Kalaallit Nunaanni Sulisitsisut peqatigiiffiat, GE.

- Oqartussat suliffeqarfiit namminersortut suliaannut akuleruppata tamanna suliffeqarfinnut ulorianarsinnaavoq.

Kalaallit Nunaanni Sulisitsisut peqatigiiffianni, GE-mi inatsisit pillugit siunnersorti, Karsten Lyberth Klausen oqarpoq.

AAMMA ATUARUK Suliffissaaleqineq akiorniarlugu innersuussisarfissaq pilersinneqassaaq

Suliffeqarnermi innersuussisarfissaq pillugu Inatsisartut ippassaq taasitinneqarput, tassanilu amerlanerussuteqartut tamassumunnga isumaqataallutik tamassuma pilersinneqarnissaa qulakkeerpaat.

Suliffeqarnermi innersuussisarfimmi suliffissarsiortut sunik suliaqarsimanertik sunillu ilinniagaqarsimanertik tamanut takusassiarisinnaavaat, taamaalilluni suliffeqarfiit ajornannginnerusumik sulisussarsiorsinnaalissallutik.

Innersuussisarfissap atulernerani Nunatsinni aviisit allallut tusagassaqartitsiviit aningaasaqarnikkut ajornartorsiulersinnaasut, GE-mi inatsisit puillugit siunnersorti, Karsten Lyberth Klausen oqarpoq.

- Suliffissarsiornermi aviisit ussassaarutaannut oqartussat unammillinnginnissaat pingaaruteqarpoq, tassami Nunatsinni aviisit ikittuinnaapput unammillerneqarunillu tamanna aviisinut kingunipiluttussaassaaq.

Karsten Lyberth Kalusen oqarpoq eqqaamaqqullugulu innersuussisarfik atorneqalerpat taava suliffeqarfiit sulisussarsiornerminni akissaajartarunnaarnissaat qaninnerulersussaammat.

AAMMA ATUARUK Kattuffik: Naalakkersuisut tusagassiuutinut ikiorsiisariaqarput

Oqartussat taama unammillerniarnerat, aviisimi Sermitsiami aaqqissuisuunerup, Poul Krarupip aamma ernumanartoqartippaa.

- Oqartussat unammilerpatigut aningaasat isertittakkavut annertuumik appariartussaassapput.Tassa ussassaarutinik suliffissarsiornermilu ussassaarutinik aningaasalersorneqaratta.

Poul Krarup oqarpoq imalu nangilluni.

- Oqartussanit aatsaat unammillerneqalinngilagut. Tassami 2009 aallarnerfigalugu oqartussat sulisussarsiornerminni ussassaarutit Danmarkimi aviisinut taamaallaat ilannguttalerpaat. Taamani oqartussat oqarput, soormi uangut unammilerutsigit, taamaaliorpugullu. Kisianni tassa maanna oqartussanit annertuumik unammilleqqinneqalerpugut.

Sermitsiap aaqqissuisuunera, Poul Krarup oqarpoq.