Kattuffik: Naalakkersuisut tusagassiuutinut ikiorsiisariaqarput

Kalaallit Nunaanni tusagassiuutitigut inissisimaneq ullumikkut ima isornartigaaq, allaat tusagassiorfiit sumulluunniit attuumassuteqanngitsut unammillertaallu nungutissinnaallugit. Taamaammat Kalaallit Nunaanni naalakkersuisut tusagassiuutinut ikiorsiisarnissamut aaqqiissutissamik pilersitsisariaqarput, Danmarkimi Dansk Journalistforbundimi sinniisuutitat Nyborgimi ataatsimiinneranni ippassaq taama oqarput.

Aningaasaqarnikkut ajornartorsiorneq, aviisinik nassiussuinermi siaruarterinermilu akitsuutit atorunnaarsinneqarnerat kiisalu ussassaarutinut aningaasartuutinik Namminersorlutik Oqartussat sipaaruteqarnerujussuat, aviisit aningaasatigut ajornartorsiornerujussuannut tusagassiortut pissutaanerarpaat.

Sermitsiap Atuagagdliutillu siorna kattutsinneqarnerisa kingorna aviisit imminnut unammilersinnaajunnaarnerat sinniisuutitat aamma tikkuarpaat.

- Aviisit taakku marluk sulisuisa imminnut pituttorsimanatik suliuarnissaat kattutinngikkallarmata neriorsuutigineqaraluarpoq, ullumikkulli aviisiliortut sinneruttutuannguit aviisinut taakkununnga marlunnut suliariaqartariaqartarput, sinniisuutitat oqarput. Nangillutillu oqarlutik alloriarneq tulleq tassaasinnaasoq Kalaallit Nunaanni aviisip ataasiinnanngornera.

- Kalaallit Nunaanni inuiaat inuinnaat oqartussaaqataanerat naapertorlugu ingerlanneqarput, tusagassiuutinik nukittuunik sumulluunniillu attuumassuteqanngitsunik pisariaqartitsisut. Taamaammat Kalaallit Nunaanni naalakkersuisut tusagassiuutinut ikiorsiisarnissamut aaqqiissuteqartariaqartut kaammatorpavut, Danmarkimi Dansk Journalistforbundimi sinniisuutitat Nyborgimi ataatsimiinnermi taama oqarput.