Sulisitsisut ikiorsiissutit pillugit: Atuutilersinneqaqqeriaannapput
Pisariaqartinneqalerpata piaartumik atulerseqqissinnaatikkumallugit unitsikkallarsigit.
Inuussutissarsiornermi ikiorsiissuutit septembarip naaneranit atuukkunnaartussat pillugit, Sulisitsisut taama oqariartuuteqarput. Ikiorsiissutit septembarip naanerani ilumut atuutivikkunnaassanersut, suli erseqqissumik nalunaarutigineqanngilaq.
Sulisitsusulli isumaat ersarippoq:
- Kigaallassaatit annertuut takkuteqqikkaluarpata, suliffeqarfiit eqqugaangaatsiarnissaat pinaveersaartinniarlugu, piaartumik isumaqatigiinniartoqarsinnaanerata pingaaruteqarnera ersarissallugu uagutsinnut pingaaruteqarpoq.
- Taamaaliunngikkuttami pisariaqanngitsumik ajornartorsiorujussualersinnaavugut, ilaatigut suliffeqarfinnik matusisariaqalernermik kinguneqarsinnaasumik, pisortaq, Brian Buus Pedersen oqarpoq.
AAMMA ATUARUK Coronaqarnerani ikiorsiissutit septembarimi atorunnaassasut
Taassuma takornarialerinermik inuussutissarsiuteqartut ajornartorsiornerat immikkut ersersinniarpaa. Taamaammat taakku eqqumaffiginiarneqartariaqartut, pisortaq isumaqarpoq:
- Ikiornissaat akisusinnaavoq. Kisianni suliffeqarfiit matuneqassappata, piffissallu takornariaqarfiup tulliani Kalaallit Nunaanni suliffinnik pilersitsinissaminnut takornarianillu niueqateqarnissaminnut, taamaasillunilu akileraarutitigut isertitsissutaanissaminnut piareeqqanngippata aamma akisoorussuussaaq.
- Aamma tamanna naatsorsuinermi ilaatinneqartariaqarpoq, Brian Buus Pedersen oqarpoq.
Ikiorneqarnissamik pisariaqartitsisut
Ilulissani takornarialerisut siunnersuisoqatigiiffianni siulittaasup, Arne Niemannip oqarnera naapertorlugu, inuussutissarsiutilinnut ikiorsiissutit aappaagumut marsip tungaanut sivitsorneqarnissaat kissaatigineqarpoq.
AAMMA ATUARUK Takornariaqarnermik ingerlatsisunut minnerusut matunerannik kinguneqarsinnaasoq
Aamma Brian Buus Pedersenip takornarialerisut ingerlaannaarsinnaanissaat neriuutigalugu Naalakkersuisut inuussutissarsiortunut suli ikiorsiisarnissaat kissaatigaa, qaquguli tungaanut ikiorneqartarnissaat ullulerusunnagu.
- Maanna ikiorsiissutit assigipajaartariaqarpaat. Assersuutigalugu ukiumut kaaviiaartitanik annaasat amerlaneri uppernarsarsinnaagukku, taava aningaasartuutinut aalajangersimasunut matussutissanik pisinnaasariaqassaatit, Brian Buus oqarpoq.
Tassunga tunngatillugu inussutissarsiornermut naalakkersuisoq, Jens Frederik Nielsen, KNR-imit oqaaseqartinniarlugu attavigigaluarparput, sulili uterfigineqanngilagut.
Ikiorsiissutinut qinnuteqarsinnaanerup sivitsorneqarsinnaanissaa Inatsisartuni aningasaqarnermut akileraartarnermullu ataatsimiititaliamiit naalakkersuisuniillu sivitsorneqarsinnaanissaat misissorniaraat, inuussutissarsiornermut naalakkersuisoqarfiup KNR-imut mailikkut ilisimatitsissutigaa.
