Suliniutinut angisuut aningaasanut inatsisip suliarinerani oqallisaapput
Suliniutinut annertuunut inatsisissaq Nunatta inatsisartuini akuerineqareerluni Folketingimut saqqummiunneqarmat qallunaat politikeriisa ulloq manna tikillugu oqallisigisuatsianngorpaat.
Siumut sinnerlugu folketingimi ilaasortaq, Doris Jakobsen, ilungersorsimaqaaq, Nunattalu aalisakkat kisiisa isumalluutigiunnaarlugit suliffeqarfiit allat pilersinneqarnissaat illersugarisimaqalugu:
- Naak suliniutit annertuut pillugit inatsisissaq suliarineqaqqimmat pitsanngoriangaatsiarsimagaluartoq, piffissaq aggersoq atorlugu suliniutinut annertuunut inatsisip pitsaanerusup atuutsinneqalernissaa uagut Siumumiit ilungersuutiginiarparput.
- Nunatta innuttaasa tamatumunnga oqartussaaqataanissaat qulakkeerniarniarparput, tamannalu qallunaat naalakkersuisui, qallunaat partiivi, sulinermullu inuutissarsiuteqartut kattuffii, allallu uagutsinnut ajunngitsumik siunnersuisinnaasut isummersuisinnaasullu, suleqatigalugit pissasoq siunniupparput, Doris Jakobsen Folketingimi oqalugiarami ilaatigut oqarpoq.
Sara Olsvig oqaluttarfimmut qaqigani arlalinnik qaqilerivoq, ilaatigullu meeqqanut- inuusuttuaqqanullu suliniutit, Danmarkimi Kalaallit atugarliortut, Imaani annaassiniarnissamut upalungaarsimaneq, SAR, Nunatta illersorneqarnissaa, aamma Nunatsinni pinerluuteqarsimasunut isumaginninneq. Suliniutilli annertuut oqalugiarnermini tikimmagit ima oqaaseqarpoq:
- Avataaniit suliartortussat inatsisissami qulakkeerneqarsimasuupput. Taakkumi minnerpaamik maani akissarsiat minnerpaaffiannik akissarsiaqartinneqarnissaat qulakkeerneqarsimammat, aamma suliartortussat isumaqatigiinniarsinnaatitaassapput suliumajunnaarniarunillu aamma pisinnaatitaaffigissallugu. Tamatuma saniatigut Kalaallit Nunaanni suliffeqarfiit sapinngisamik atugarineqarnissaat inatsimmi qulakkeerneqarsimavoq, aamma sanaartornerup nalaani. Sara Olsvig, Danmarkip aappaagumut aningaasaqarneranut inatsisissap pingajussaaneerneqarnerani, taama ilaatigut oqaaseqarpoq.
