Suliniutinut angisuunut inatsisissaq Siumut avaqqullugu akuersissutigineqarpoq

Inatsisartuni inissat 31-upput, Siumut taakkunannga aqqaneq-marlunnik ilaasortaatitaqarluni. Siumut suliniutinut angisuunut inatsisissatut siunnersuummut akuersinatilluunniit itigartitsinngillat:

- Pissutigalugu inatsisissaq naammassineqanngitsoq akueralugulu itigartissinnaannginnatsigu. Suliaq naammassineqanngimmat taasissutigisinnaanngilarput, Siumup siulittaasua Aleqa Hammond oqarpoq.

Inatsisissatut siunnersuummut atatillugu aappassaaneerneqarnera pingajussaaneerneqarnissaanullu piffissaq sivikippallaartoq Siumut isumaqarpoq, allannguutissatut siunnersuummi immikkoortut 21-ummata, tamakkulu sukumiisumik tusarniaassutigineqaqqaartariaqartut.

Siunnersuutip Nunatta oqaluttuarisaaneranut taama pingaaruteqartigisup tamakkiisumik taperserneqannginnera, Naalakkersuisut siulittaasuata Kuupik V. Kleistip uggoraa.

- Qaqutigoortorujussuuvoq. Uanga inatsisissatut siunnersuutinut pingaarutilinnut siusinnerusukkut takunikuunngilara partiit isumminngitsut aalajangersimasumik. Taamaammat isumaqarpunga tamanna qaqutigoortorujussuusoq aamma eqqumiiginalaarpoq, Kuupik V. Kleist oqarpoq.

Nunatsinni partiit naalakkersuisuutitallit illuatungiliuttunilu partiit annersaata akornanni siunnersuummut matumunnga isumaqatigiinngittoqarnerujussua Nunatta avatitsinniit isiginiarneqarneranik innarliisinnaannginnersoq, Kuupik V. Kleist aperaarput, akivorlu:

- Inatsisartut tamarmik qanoq ittuunissaanik isumaqatigiipput, taamaammat tamatuma annertunerusumik sunniuteqarnissaa naatsorsuutiginngilara. Apeqqutaanerpaajugunanngilaq kikkut aalajangiisuunersut, kisianni suna aalajangerneqarnersoq, Kuupik V. Kleist oqarpoq.

Siunnersuulli Inatsisartuni aappassaaneerneqarnerani erserpoq akuersissutigineqarumaartoq, Atassut matumani aamma tapersersuisuulluni.

Siumuminngaanniillu erseqqissaassutigineqarpoq, apeqqut manna Inatsisartunut aappaagu qinersinissamut qitiulluinnarumaartoq:

- Inuiaqatigiinni aningaasarsiornermi pingaaruteqarluinnartuusut qineqqusaarnermi qitiutinneqassapput, aatsitassarsiorneq aningaasatigut immitsinnut napatissinnaanissatsinnut aqqutissaasoq Siumup upperilluinnarpaa, tamannalu qulakkeerniarlugu inuiaqatigiinnut annertunerpaamik pissarsiassaq Siumumit qineqqusaarutini qitiutinneqassasoq naatsorsuutigineqassaaq, Siumup siulittaasua Aleqa Hammond oqarpoq.