Suliniuteqarnermut nersornaaserneqarnini tulluusimaarutigaa
- Nuannersorujussuuvoq, upperiuminaalaarlunilu. Ilimaginikuunnginnakku isumassarsiaq taamarsuaq kinguneqarsinnaasoq, kisianni nuannersorujussuuvoq taamatut nersornaasigaalluni, "Inuuneruna iggoraarsuk"-mik aallartitsisoq Paninnguaq Heilmann oqarpoq.
Aamma atuaruk Suliniuteqartunut nersornaat tunniunneqarpoq
Nersornaat kommunalbestyrelsip ataatsimiittarfiani tunniunneqarpoq, borgmesterilu Asii Chemnitz Narup, borgmesterillu tulliata aappaa Martha Abelsen tassunga atatillugu oqalugiarlutik.
"Inuuneruna iggoraarsuk"-mi suleqataasut sinnerlugit katillugit arfineq-marluk nersornaammik tunineqarput, nersornaallu 15.000-it koruuninik aningaasartaqarpoq, tamarmillu immikkut CD-mik aamma tunnineqarlutik.
- Neriuppugut suliap ingerlateqqinnissaanik matunik ammaassissasoq. Assigiinngitsunik angorusutaqaratta, taava pissanganarpoq qanoq issanersoq nersornaaserneqarnerput kinguneqassanersoq, Paninnguaq Heilmann oqarpoq.
Aamma atuaruk Suliniut 'Inuuneruna Iggoraarsuk' nunanut allanut saqqummiunneqalersoq
Inuit suliniummik "Inuuneruna iggoraarsuk"-mmik soqutiginnittut suliniutip internetikkut attaveqatigiittarfikkut Facebookikkut qupperneranut alakkaassinnaasut Paninnguaq Heilmannip kajumissaarutigaa, suliniutitillu annertuut piffissami aggersumi aamma ingerlateqqinniarneqartut oqaluttuaralugu:
- Imminut toquttarneq pillugu dokumentariliorneq aallarteruttorpoq, Inuk Media NunaFondenilu suleqatigalugit dokumentariliorluta, taava iluatsilluariarpata qaammatip tulliani Nunavummi Iqalunnukassaanga, imminut toquttarnerup pinaveersaartinneqarnissaa pillugu naapisimaarnermi oqalugiariartussallunga, Suliniummik "Inuuneruna iggoraarsuk"-mik aallartitsisoq Paninnguaq Heilmann oqarpoq.
Suliniut siorna juunip ulluisa 28-anni aallartinneqarpoq. Suliniuteqartunullu ukiumoortumik nersornaat Kommuneqarfik Sermersuumit sisamassaa tunniunneqarpoq.
