Suliniuteqartunut nersornaat tunniunneqarpoq

Kommuneqarfik Sermersuumi suliniuteqarnermut nersornaat 2014-imoortoq ippassaq tallimanngornermi tunniunneqarpoq, suliniullu "Inuuneruna iggoraarsuk" nersornaaserneqarpoq.

Allattoq Laura Aggernæs, Mads Lynge

februaarip 07-at 2015 15:27

Kommuneqarfik Sermersuup nittartagaani tamanna atuarneqarsinnaavoq.

Nersornaat kommunalbestyrelsip ataatsimiittarfiani tunniunneqarpoq, borgmesterilu Asii Chemnitz Narup, borgmesterillu tulliata aappaa Martha Abelsen tassunga atatillugu oqalugiarlutik.

"Inuuneruna iggoraarsuk"-mi suleqataasut sinnerlugit katillugit arfineq-marluk nersornaammik tunineqarput, nersornaallu 15.000-it koruuninik aningaasartaqarpoq, tamarmillu immikkut CD-mik aamma tunnineqarlutik.

Aamma atuaruk Suliniut 'Inuuneruna Iggoraarsuk' nunanut allanut saqqummiunneqalersoq

Suliniut Paninnguaq Heilmannimit aallartisarneqarsimavoq. Taassuma nersornaaserneqarnermi oqaatigaa suliniutitik annertuut piffissami aggersumi ingerlattussaallugit, imminullu toquttarneq pillugu filmip piviusulersaarutip NunaFonden Inuk Medialu peqatigalugit suliarineqartussaanera assersuutigalugu. Tamanna pillugu ilaatigut Nunavummi Iqalunnut angalasussaanertik oqaluttuaraa.

Suliniut "Inuuneruna iggoraarsuk" siorna juunip ulluisa 28-anni aallartinneqarpoq.

Suliniuteqartunut ukiumoortumik nersornaat Kommuneqarfik Sermersuumit sisamassaa tunniunneqarpoq.