Suliniummi pisortap efterskolip iluatsinnissaa qulakkiissagaa

Nuummi Timersortartunut Efterskolessamik suliniuteqartut siulersuisuisa Poul Petersen, 44-nik ukiulik, suliniummi pisortatut atorfinitsippaat. Taanna atorfimmi siulliulluni atorfinittoq, 2017-imi aggustip aallaqqaataanit aallartissaaq.

Kommuneqarfik Sermersooq suliniummik Timersortartunut Efterskolimut aallartisaanermut aningaasaleereernikuuvoq, suliniulli aningaasaateqarfinnit allanit tapiissutinik isumalluuteqarluni ingerlasussaavoq. 

Taamaammat Poul Petersenip, suliniummi pisortassap, aningaasaliisussarsiorneq pingaarnertut suliassarissavaa. 

Suliniummilu siulersuisut siulittaasuata, Finn L. Nielsenip Petersenip suliassaq kivissinnaagaa qularinngilaa. 

-  Poul timersortartuuvoq pimoorussisoq, Kalaallit Nunaanni peqatigiiffilerinermi akuulluinnartoq taamalu nammineq kajumissutsiminnik ingerlatsissunik inuusuttunillu sullissinermik sungiusimasalik, Finn L. Nielsen tusagassiuutinut allappoq. 

Nuummi Timersortartut Efterskoleqalernissaanik suliuteqarnermi 9-10 klassemi atuartut timersortartut efterskoleqalernissaannut suliniutaavoq. Efterskolertut ilinniakkanut allanut soorlu GUX-imut, inuussutissarsiutigalugu ilinniarfinnut allanullu ingerlaqqittarnissaat anguniagaavoq. 

AAMMA ATUARUK Sermersuup timersortartunut efterskolissaq 700.000 koruuninik tapiiffigigaa