Suliffeqarnermut ilanngaat tamanut iluaqutaassanngilaq
Naalakkersuisut suliffeqarnermut ilanngaammik aningaasarsiaqarnerpaanullu qaavatigut akileraarummik taallugu akileraartarnermut allanngortitsinialikkersaarlutik eqqarsaatersuuteqarput.
Suliffeqarnermullu ilanngaat Nunatsinni sulisartut ilaannut iluaqutaassasoq Roskildep Universitetiani professori oqarpoq.
- Aalajangersimasumik suliffillit suliffeqartuartullu akileraarnikinnerulernermikkut aningaasaateqarnerulissapput, akileraartarneq pillugu ilisimasalik Roskildip Universititiani professori Bent Greve oqarpoq.
AAMMA ATUARUK Demokraatit akissarsiaqqortunerit immikkut akileraarutaannut qujaannartut
Isertitakinnerit akunnattumillu isertitallit akileraarnikinnerulerunik aningaasanik tigumiaqarnerulissapput.
Aningaasanillu tigumiaqarnerulerunik pisiortornerulissasut, inuillu niuffannerulernerisigut inuiaqatigiit ulappunnerulissasut Naalakkersuisut ilimasupput. Taamaalippat akileraarutitigut akitsuutitigullu isertitat qaffassapput.
Taamalumi ilimasunneq professorip isumaqatigaa:
- Inuiaqatigiit ataatsimut isigalugit pisissutissaqarnerusoqalissaaq. Akissaatikinnerusunullu tamanna iluaqutaassasoq neriuttoqarsinnaavoq.
AAMMA ATUARUK Sulinermut ilanngaat isertitakkaanit aningaasalersorneqarsinnaasoq
Akileraartarnermullu Naalakkersuisut aaqqissuusseqqinnialikkersaarnerannut aamma eqqugaasussaqarpoq.
- Sivisuumik suliffeqanngitsut soraarnerussutisiaqartunullu aaqqissuusseqqinnermit ajorsartuussapput. Akileraartarnermimi sulinermut ilanngaammik atuutsitsilertoqaraluarpat taakku iluaqutissinneqassanngillat, Bent Greve oqarpoq.
Isertitakinnerusunut akunnattunillu isertitalinnut akileraarnikinnerulersitsinissaq landskassemut akisussaaq. Taamaattumik Naalakkersuisut assersuutigalugu ukiumut 700.000 sinnerlugit isertitalinnut qaavatigut akileraarusersuinikkut matuneqarnissaa eqqarsaatersuutigaat.
- Danmarkimi isertitaqarneruleriartortilluni akileraarneruleriartortoqartarneranut aaqqissuussinialikkersaarneq assigusumik allannguisoqassaaq, isertitakkaanerit isertitakinnernit akunnattunillu isertitalinnit akileraarnerujussuusarmata, Bent Greve oqarpoq.
