Suliffeqarfiit sulerusussuseq qaffatsinniarlugu iliuuseqaqataapput
Brugsenip nuna tamakkerlugu 500-nik sulisoqartup sulinngitsoortarneq ilisimaarivaat.
- Suliffeqarfinni tamani ajornartorsiut takussaasarpoq, aamma uagut suliffeqarfiutitsinni. Kisianni qujanartumik sulisugut amerlanerpaat aalajaallutik suliartortarput, Irene Jeppsen, Brugsenimi attaveqaqatigiinnermut sulisoq oqarpoq.
Ajornartorsiutip annertusinnginnissaa pillugu suliffeqarfittut iliuuseqarfigisarpaat:
- Ilaatigut pikkorissaanerit. Ukiormanna pikkorissaanerit qulit ingerlannikuuagut. Pikkorissaanerillu imaqarsinnaapput, inuttut ineriartorneq, peqqinneq attaveqaqatigiinnerlu. Tassa sulisugut eqqumaffigisorujussuuagut pikkorissarluartuarnissaallu anguniartuarlutigu, Irene Jeppson oqarpoq.
Aamma atuaruk Qineqqusaartut inuusuttut: Sulinermut akisussaaffeqarnerulerta
Sulisitsisut kattuffiat GA-p oqaatigisinnaanngilaa ajornartorsiut qanoq annertutiginersoq ilisimavaallu ilaasortami akornanni 7-8000-usuni takussaasoq. Karsten Klausenillu suliffeqarfinnut ilaasortaminnut atugassarititaasut malinneqarniassammata ilaasortaminnut maleruagassaqarput. Suliffeqarfik sulisorlu ataatsimoorlutik suliffeqarfik pillugu naliliisassasut, taamaattumik ataavartuunissaat iliuuseqarfigisarpaat.
- GA-miit suliffeqarfiutaatittalu iluani suliffeqarfigissaarnissaq sulinermilu atugassarititaasut pitsaasuunissaat anguniartarparput sulisorisatta sulerusussuseqalernissaannut, Karsten Klausen sulisitsisut kattuffiani allaffeqarfiup pisortaa taama oqarpoq.