Suliffeqarfiit 150-it ikiorsiissutinut qinnuteqaataat akineqartut

Coronap ajornartoortitsinerata nalaani nunarput tamaat isigalugu suliffeqarfiit 300-it missaanniittut ikiorserneqarnissaminnik qinnuteqarsimapput. Taakku affaasa qinnuteqaataat manna akineqarsimapput.
Ikiorsiissutit pillugit qinnuteqarnissamut assut soqutiginnittoqartoq paasisinnaavara. Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoq Jess Svane taama oqarpoq. Assi © : Paalu Møller
Allattoq Anders Dall
apriilip 17-at 2020 11:07
Nutserisoq Apollo Jeremiassen

Coronap ajornartoortitsineranut atatillugu suliffeqarfinnut sulisartunullu ikiorsiissutit assigiinngitsut marluk Naalakkersuisunit saqqummiunneqarmatali, qinnuteqaatit imaaginnavissimapput.

Ikiorsiissutinut qinnuteqarnissamut sapaatit akunneri pingasut sinnerlugit periarfissaareersullu, suliffeqarfiit qinnuteqartut 300-it missaanniissimapput, taakkunanngalu 150-it akineqarsimallutik.

Tamatuma saniatigut sulisartut akissarsiaasa annaaneqarnerannut atatillugu suliffeqarfiit 68-it qinnuteqarsimapput, taakkunannga 34-t maannamut akissutinik nassiussiffigineqarsimallutik.

AAMMA ATUARUK Coronavirusip ajornartorsiortitsinera: Nuummi taxaatillip kaaviaartitami affai sinnerlugit annaagai

Naalakkersuisut tusagassiuutinut nalunaarumminni taama allapput. Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoq Jess Svane tamanna pillugu ima oqarpoq:

- Ikiorsiissutit pillugit qinnuteqarnissamut assut soqutiginnittoqartoq paasisinnaavara. Taamaattumik piffissap artukkiisup tamatuma qaangerniarnerani ikiorsiissutit suliffinnut sulisartunullu tapersersueqataasinnaanerat naatsorsuutigaara.

AAMMA ATUARUK Nunatsinni inuussutissarsiornermut ikiorsiissutit ima ipput

- Taamaattumillu suliffeqarfimmi illuatungerisat suleqatigalugit ikiorsiissutit piaartumik pilersissimagatsigit aamma tulluusimaarutigaara. Tamatumunnga ilanngullugu qinnuteqaaterpassuarnik ullut tamaasa tigusillutillu suliarinnittartut Akileraartarnermut Aqutsisoqarfimmi aamma Greenland Businessimi suliarujussuaq iluarisimaarpara, Jess Svane oqarpoq imalu itisiliilluni:

- Naalakkersuisut Inuussutissarsiornermut- aamma Suliffeqarnermut kattuffiit ingerlaavartumik attaveqarfigiuarpaat, taamaaliornermi qulakkeerniarneqarpoq malittarisassat ersarinneri nalilersorsinnaajumallugit.

Suliffeqarfiit qinnuteqarsimasut, aamma isumaqatiginngisaminnik aalajangiussamik tigusaqarsimasut aalajangiussinermik Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoqarfimmut maalaaruteqarnissaat kaammattuutigineqarpoq, tassanilu maalaarutigisatut suliassat piaartumik suliarineqassapput.