Coronavirusip ajornartorsiortitsinera: Nuummi taxaatillip kaaviaartitami affai sinnerlugit annaagai
Naalakkersuisut siulittaasuata Kim Kielsenip (S) ataasinngornermi marsip 16-iani nunatsinni coronavirusimik tunillatsittoq siulleq kalerriutigaa.
Nappaallu tuniluutileqqunagu Nuuk kingornatigut matuneqarmat inuussutissarsiortut eqqugaapput. Taxaatillit aamma.
- Kalerriutigineqaaannartoq malugaarput, Nuuk Taxip pisortaa Janus Ejgaard oqarpoq.
AAMMA ATUARUK Tamaat isigalugu: Coronavirus pillugu killiffik
Coronavirusi ernummataanngikkallarnerani Nuuk Taxi 68-inik ingerlaartoqarput, nappaatillu nunatsinnut anngunneraniit qulinik ikileriarsimapput. Kaaviiaartitallu 26 procentinik apparsimapput.
- Matoorartut - tassa piniarfiit, suliffeqarfiit, meeraaqqeriviit, atuarfiit, imigassap imerniartarfiillu - amerliartornerat ilutigalugu kaaviiaartitat ikiligaluttuinnarsimapput, Janus Ejgaard oqarpoq.
Nuuk Taxip kaaviiaartitai ullut aqqanillit ingerlanerini procentinik 60-inik appariarput.
Henrik Thomsen taxamini ingerlaartoq assimi takuneqarsinnaavoq. Assi DR-imi aallakaatitamit inuttaata nammineq assilisaraa.
Taxaatilik Henrik Thomsen eqqugaasunut ilaavoq:
- Ilaasugut tassanngaannaq ikileriataarput. Tuniluuttoqalernissaata ernummatigineqarnera taxartartunnut aamma siaruaappoq. Ingerlatsisukka unerarput, Henrik Thomsen oqarpoq.
Taasuma ingerlatsisui sisamat marsip naanerani ingerlaarput, nalinginnaasumik quliusaraluarput. Taxaalu pingasuinnaat ingerlaarput arfiniliusaraluarlutik.
- Taxa uninngaannartoq aningaasartuutaannaavoq.
Tassa ilaasussaaleqinerup aquttussaaleqinerullu kingunerisaanik kaaviiaartitai apparujussuarput.
- Taxanik ingerlatsisoq ilaasoqaruni aatsaat aningaasarsiussaaq, Janus Ejgaard oqarpoq.
Taxa ataaseq atorunnaarlugu ikiorsiissutinut qinnuteqarpoq
Taamaammat Henrik Thomsen taxaatini ataaseq unitsivinniarlugu qaammat aallartittoq aalajangerpoq. Ingerlaartiinnarnissaami imminut akilersinnaanngilaq.
Naalakkersuisut inuussutissarsiortunut ikiorsiissuteqarnissamik qinnuteqarfigineqarsinnaasut nutaarsiassatigut paasivaa:
- Taava eqqarsarpunga: Taxaatillit namminersortuupput. Inunnik sullissisuuvugut, taakkumi ingerlattarpagut.
AAMMA ATUARUK Coronap ajornartorsiortitsinera: Inuussutissarsiutit milliardip affaanik ikiorserpaat
Qinnuteqaataali itigartinneqarput.
Kaaviiaartitai ukiup siulianut marsimut decembarimut taavalu januaarimut februaarillu qaammataanut sanilliullugit appariaateqarpiarsimannginneri tunngavilersuutigineqarlutik.
Ikiorserneqassagaannimi isertitat minnerpaamik procentinik 30-nik apparsimasussaapput.
Unali assigiinngissutigigamiuk: Henrik Thomsen ukioq kingulleq pingasunik taxaateqarpoq, ukioq mannalu arfiniliullutik,
- Taama eqqarsarnerat eqqumiippoq. Coronavirusip ernummatigineqarneranut sakkortuumik eqqugaasut ikiorneqartariaqartut neriuppunga paasilerumaaraat, Henrik Thomsen oqarpoq.
Suliat ataasiakkaat oqaaseqarfigisinnaanngikkaat
Naalakkersuisut inuussutissarsiortunut ikiorsiissutaannut qinnuteqaatit Greenland Businessimi suliarineqartarput.
Suliat ataasikkaat oqaaseqarfigisinnaanngikkitik Greenland Businessip pisortaata Christian Wenneckep KNR-imut allakkatigut paasissutissiissutigaa:
- Naalakkersuisut aalajangiinerminni tunngavii malippagut. Suliffeqarfiillu anginerit ukkatarineruagut, suliassat taakkununnga tunngasut ilarussuunnerusimasuusarmata, Christian Wennecke allappoq.
