Naak Danmarkimi inatsit nutaaq, kalaallit meerartaannik pinngitsaaliissummik inissiinissani kalaallit kulturiannik oqaasiinillu eqqarsaatiginnittarnissamut qulakkeerinnittussaq ukiup ataatsip matuma siorna atuutilersinneqaraluartoq naammattumik atorneqanngilaq. 

Inatsisileritooq, kalaallit meeqqat Danmarkimi angerlarsimaffiup avataanut inissinneqartarnerannik ukiuni arlalinni malinnaasoq, kalaallillu Danmarkimi inuttaasut inatsisitigut isumannaatsuunerannik pitsanngorsaanermik suliaqartumi Sila360-imi ullumikkut pisortaasoq, Tina Naamansen isumaqarpoq.

- Ernumanarluinnarpoq, taanna oqarpoq.

Inatsit siorna maajimi atuutilersinneqartoq naapertorlugu immikkut ilisimasaqarfiup, VISO-p ataani kalaallit kulturiannik oqaasiinillu immikkut ilisimasaqarfiup kalaallit meeqqat angerlarsimaffiup avataanut pinngitsaaliissummik inissinneqarsimasut pillugit suliat, tarnikkut misissuutinik tunngaveqartut naliliiffigeqqissavai.

Misissuutit kalaallinut ilaqutariinnut tunngatillugu suliani atorneqartarneranut isornartorsiorneqartarpoq, misissuutimmi danskit kulturiannut oqaasiinullu naleqquttunngortillugit suliaapput. Illuatungeriit arlallit misissuutit kalaallinut ilaqutariinnut atorneqarpata inissiinerup kukkusumik tunngavilerneqarsinnaanera oqaatigaat.

VISO-p danskit kommuniinit suliat misissoqqinneqartussat 47-t ukiup ataatsip ingerlanerani tiguaat. Suliassaqarfiup suliat 315-it ukiup affaata ingerlanerani misissuiffigeqqinnissaat naatsorsuutigigaluarpaa.

Suliat 16-it naammassineqareerput. VISO-p misissuutit inissiinernut marlunnut qularnartumik tunngaviliisimasutut nalilerpaat, misissuutillu suliat sinnerini 14-ini kukkusumik aalajangiinermik kinguneqarsimanatik.

Tina Naamansenilli inatsit tunngaviusumik kukkusumik ilusilersugaasoraa.

- VISO-p naliliinerisa ilai takuakka, isumaqarpungalu kukkusumik suliarineqartut. Nutaamik naliliinerunngilaq. Angajoqqaat oqaloqatiginagit angajoqqaat piginnaasaannik misissuinermik tunngaveqartumik pinngitsaaliissummik inissiinerit naliliiffigineqarnerat suliatigut illersorneqarsinnaanngitsoq isumaqarpunga, taanna oqarpoq.

KNR-ip isornartorsiuineq immikkut ittumik ilisimasaqarfimmut VISO-mut saqqummiuppaa. Taakku danskit naalakkersuisuinik suli pilersitsisoqannginnera pissutigalugu oqaaseqarnissamut periarfissaqarnatik allakkatigut akissutigaat.

Aaqqiissutissaqanngitsoq

Laila Bertelsen Tina Naamasenitulli kalaallit angerlarsimaffiup avataanut inissinneqartut qanimut malinnaaffigai. 

Taanna suliani amerlasuuni ikorfartuisutut taamaammat ilaqutariit kommunimullu qanimut attaveqarfigisarpai.

Taassuma VISO-p kommuninit 47-nnarnik ukiup ataatsip ingerlanerani pissarsisimanera pingaartumik eqqarsarnartoqartippaa.

Laila Bertelsenip oqarnera naapertorlugu taassuma kalaallit meeqqat pinngitsaaliissummik inissinneqartut 17-it VISO-mut nassiunneqanngitsut ilisimavai, naak tamanna inatsisit naapertorlugit pisinnaatitaaffigigaluaraat.

- Ingerlatsiviit inatsimmik unioqqutitseqqeqattaarneranni inatsimmik innuttaasut eqqorneqartut inatsisitigut isumannaatsuunissaannik illersuisumik peqannginnera ernumanarpoq. Iliuuseqarnissamut periarfissaqarpallaanngillat. Tamannalu meeqqamut naggataatigut sunniuteqartarpoq, Laila Bertelsen oqarpoq.

Inatsit naapertorlugu kommunit suliani angajoqqaat piginnaasaannik misissuinermik atuiffiusimasunik namminneerlutik nassiussisussaatitaapput.

VISO-mi immikkut ilisimasaqarfiup kommunit sulianik nassiussinissaannik kaammattuuteqarfigisimallugit siusinnerusukkut paasissutissiissutigaa.

Nammineq piumassutsimik inissiinerit aamma naliliiffigineqaqqittariaqartut

Tina Naamansenip oqarnera naapertorlugu Sila360-ip politikerit inatsimmi ajoqutaasinnaasunik arlalinnik eqqumaffiginnitsinniarsarai.

Taassuma inatsisip kalaallit meerartaannut nammineq piumassutsimik aallaaveqartumik inissinneqarsimasunut aamma atuutsinneqarnissaa kissaatigaa.

Naak nammineq piumassutsimik inissiinerit angajoqqaat akuersissuteqarnerannik tunngaveqaraluartut suliamik isumaginninneq kalaallinut tunngasut ilisimasaqarfigineqaratik suliarineqartarneri ajornartorsiutaasoq, Tina Naamansen isumaqarpoq.

- Angajoqqaarpassuit oqaloqatiginikuuagut, amerlanerillu inissiisoqarnissaanut akuerissuteqarnissaminnut tatineqanngikkunik kaammattorneqartartut maluginiarparput. Ilaat meeqqamik najoqatiginninnerulernissamik ilisimatinneqartarput, ilaasali eqqartuussivitsigut suliaqartoqarnissaa annilaangagisarpaat.

- Taamaammat inissiisoqarnissaanut akuersissuteqaraangamik piviusumik paasissutissiiffigineqanngikkajupput, Tina Naamansen oqarpoq.

Taamaammat inissiinissamut akuersissuteqarnerit inatsimmut aamma ilaatinneqartariaqartut suliallu kalaallinut tunngatillugu immikkut ilisimasaqartunit suliarineqartariaqartut taanna isumaqarpoq.

Sila360 naapertorlugu inatsit maannakkut naliliiffigineqaqqittariaqarpoq.

- Tarnip pissusianik ilisimasalinnik, inatsisilerituunik aamma isumaginninnermi siunnersortinik kalaallisut oqaasilinnik, sulianik misissuisinnaasunik aamma kalaallinik ilaqutariinnik toqqaannartumik oqaloqateqarsinnaasunik angalaqatigiittartunik minnerpaamik pilersitsisoqartariaqarpoq, Tina Naamansen oqarpoq.

Tina Naamansenip oqarnera naapertorlugu kalaallit meeqqat pisariaqartitaasa eqqarsaatigineqarnissaat pingaaruteqarpoq, meeqqat taamaalillutik inissinneqarnerminni kalaallisut kinaassusertik annaassanagu.

Tamatuma saniatigut inissiinermi attaveqatigiiffinnik arlalinnik pilersitsisoqartariaqartoq taanna isumaqarpoq.

KNR-ip isornartorsiuineq Isumaginninnermut Ineqarnermullu Ministereqarfimmut saqqummiuppaa. Ministereqarfiup isornartorsiuineq naalakkersuisut tunuarnikuunerat pissutigalugu oqaaseqarfigisinnaanagu allakkatigut akissuteqarfigaa.

Kalaallit folketingimut ilaasortaatitaasa, Naaja H. Nathanielsenip (IA) aamma Qarsoq Høegh-Damip (N) suliat arlallit maannamut suliareqqinneqareersut aamma isornartorsiorpaat.

- Inuit ataasiakkaat oqaluttuaat arlallit tusaareerlugit aamma kattuffiit mianersoqqussuteqartut takuagut. Susoqartoruna suliassat 16-iinnaat suliarineqarsimammata? Tamatumunnga suna pissutaanersoq misissorluarneqartariaqarpoq. Taama pisoqarnera aarlerinarsinnaavoq, Qarsoq Høegh-Dam KNR-imut sapaatip akunnerata siuliani oqarpoq.

Folketingimut ilaasortat marluullutik danskit naalakkersuisuisorigallagaannut suliaq erseqqissaassuteqarfigeqqullugu saaffiginnissimallutik paasissutissiissutigaat.