Suliassat angisuut pillugit inatsit, SIK-mit iluarineqarpoq

- Isumaqarpugut inatsit aallarniutaasoq aamma suliffeqarfiit eqqarsaatigalugit isumaqarpunga inatsit tunngaviliilluarsinnaasoq. Taamaattorli isumqarpugut uangutsinnut pitsaanerpaajusimassagaluartoq, suliffeqarfiit nunaqavissut, sulisitsisut nunaqavissut aamma Nunatsinni sulisartut isumaqatigiinniarsinnaaneq tigusimagaluarpassuk.

SIK-p siulittaasua, Jess G. Berthelsen taama oqarpoq.

Suliassat angisuut pillugit inatsisissamut siunnersuutit allannguutissaat, SIK-mik aamma Aatsitassanut Naalakkersuisumit, Ove Karl Berthelsenimit marlunngormat unnukkut kingullermik oqaloqatigiissutigineqarput.

Inatsimmilu ilanngutassatut Naalakkersuisunit innersuussutigineqartut qimerlooreerlugit malunnarpoq, SIK-p kissaataasa ilaat ilanngunneqarsimasut.

SIK-p ilaatigut kissaataa tassaavoq, nunat allamiut Nunatsinni sulisinneqalerneranni taakku akissarsiaasa, SIK malillugu akissarsiaritinneqartartut minnerpaaffiat ammut qaangerneqannginnissaa. Tamannalu anguneqarsimasoq Jess G. Berthelsenip nuannaarutigaa.

- Taassuma ilanngunneqarnera pingaaruteqartorujussuusoq isumaqarpunga. Taamaalilluta inatsit tunuliaqutaralugu misissuisinnaanngussagatta, ilumut maani Nunami aningaasarsiaritinneqartunit mikinerusumik nunat allamiunut aningaasarsiaqartitsisoqannginnissaanik, Jess G. Berthelsen oqarpoq.

Soorlu Trasparency Greenlandip siulittaasuata, Anders Meilvangip ulloqeqqanut radioaviisimi oqaatigigaa, inatsisissatut siunnersuut naammaginartumik allassimaleraluartoq, taamaattoq taassuma pilersikkiartiaarnerani suliaq naammaginanngitsumik ingerlanneqarsimasoq oqaatigalugu.

SIK-llu siulittaasua aamma suli nalornissuteqarpoq.

- Siullermik saqqummiunneqartumik pitsaaneruvoq, taamaallaat nalornissutigaarput, ilaatigut inatsimmi allassimasoq, suliffeqarfissuit eqqarsaatigalugit maanni qulakkeerniarneqarpoq nunaqavissut suliffeqarfiit sulisinneqarnissaat. Kisiannili inatsimmi aamma allassimagami, nunaqavissut suliffeqarfiit suliassaq, teknikkikkut allatigullu naammassisinnaanngippassuk, taava avataaninngaanneersunik suliassaq suliarineqarsinnaasoq. Taama allasimasup atornerlunneqarsinnaanera ernumagaarput, SIK-p siulittaasua, Jess G. Berthelsen.