Suliassat angisuut pillugit inatsisissaq SIKp sunniuteqarfigaa

Inuussutissarsiornermut ataatsimiititaliap allannguutissatut kissaatigisaasa saniatigut, allannguutissat allat inatsisissamilu oqaasertat nutaat ilanngunneqarlutik, Inatsisartuni aqagu oqallisigineqartussanngorput.

Suliassat angisuut pillugit inatsisissami, Inuussutissarsiornermullu ataatsimiititaliap isumaliutissiissutaani, nunat allamiut sulisorineqartussat akissarsiaasa minnerpaaffeqarnissaat qulakkiigaanngilaq. SIK-p siulittaasuata, Jess G. Berthelsenip Aatsitassanullu Naalakkersuisup, Ove Karl Berthelsenip ippassaq unnukkut oqaloqatigiinnerisa kingorna tamanna allanngortinneqassasoq, Jess G. Berthelsen neriuuteqarpoq.

- Sapinngisamik qulakkeerniagassarput unaavoq, tassa nunat allamiut Nunatsinnut suliartortinneqartut, Nunatsinni sulisartunit annikinnerusumik aningaasarsiaqartinneqannginnissaat. Taamaattoqassappammi namminersorlutik Nunatsinni suliffeqarfiutillit, nunat allamiunut suliffissuaatilinnut unammillersinnaassanngimmata, SIK-p siulittaasua, Jess G. Berthelsen Radioaviisimut tunngavilersuivoq.

Inatsisissamut siunnersuummut isumaliutissiissut, Inuussutissarsiornermut ataatsimiititaliap ataatsinngormat unnukkut saqqummiuppaa. Saqqummiussarli taamatut isikkoqartoq, Jess G. Berthelsenip naammaginngilaa, tassami nunat allamiut akissarsiassaasa minnerpaaffilerneqarsimaneranik takussutissaqanngimmat.

- Taamaattumik tamanna ernummaterput, Ove Karl Berthelsenimut ippassaq saqqummiupparput. Pissanganassaaq taamatut isumaqatigiinniarnerput aallaavigalugu nunat allamiunik akissarsiakitsitsinissaq pinngitsoortinneqarsinnaassanersoq. Ove Karl Berthelsenimit paasitinneqarpunga, pingaartinneqassasoq nunat allamiut suliffeqarfissui maani aallartinniarnerminnut atatillugu qinnuteqarpata, sulisartut akissarsiaasa pingaartinneqarnissaat piumasaqaataassasoq, Jess G. Beerthelsen oqarpoq.

Taassuma ippassaq unnukkut oqaloqatigalugu naapisimaaqataata, Aatsitassanut Naalakkersuisup, Ove Karl Berthelsenip uppernarsarpaa, Jess G. Berthelsenip inatsisissami allannguutissatut piumasaqaataasa ilai ilanngunneqassasut.

- Naapisimaarnitsinni Inuussutissarsiornermut ataatsimiititaliap isumaliutissiissutaa aallaavigaarput. Taamaattorli aamma SIK-mit piumasaqaatit assigiinngitsut qangalili aamma oqaloqatigiissutigisarsimasagut, qanoq inatsisitigut tamakku nalimmassarneqarsinnaanerinut oqaloqatigiinnermi kingullerpaajusumi ippassaq eqqartorpagut, Ove Karl Berthelsen oqarpoq.

Taanna aperaarput, oqaloqatigiinneq inatsisissap oqaasertaanik allannguisussaassanersoq.

- Aap, kisianni ataatsimiititaliap allannguutissai ilanngullugit allanguisoqassaaq, paragraf 10-mi allannguuteqarfigineqassalluni. Tamannalu Inatsisartuni aqagu saqqummiunneqassaaq, Aatsitassanut Naalakkersuisoq, Ove Karl Berthelsen uppernarsaavoq.

Inuussutissarsiornermut ataatsimiititaliami ilaasortap, Karl Lyberthip, Siumut, Ove Karl Berthelsen, sapaatip akunneri arlaqanngitsut matuma siorna isornartorsiorpaa, inatsisissaq pillugu SIK-mik isumaqatigiinniaqateqarnera pillugu.

Karl Lyberth tusagassiutinut nalunaarummini allappoq, inatsissaq pillugu Naalakkersuisunut ilaasortap kattuffimmik isumaqatigiinniarnera akuerineqarsinnaanngitsoq, Inuussutissarsiornermullu ataatsimiititaliap suliaanut tamanna mitalliinerusoq.

Tamanna pillugu Ove Karl Berthelsen ima oqarpoq.

- Soorunami Naalakkersuisutut akisussaasutullu kikkunnilluunniit oqaloqateqartarsinnaanera akisussaaffigivara. Minnerunngitsumik suliamut attuumassuteqartumut oqaloqateqarsinnaanera akisussaaffigalugu. Inatsit maanna suliarineqartoq SIK-mut annertoorujussuarmik pingaaruteqarpoq, taamaattumillu sulisartut kattuffiata siulitaasuanik oqaloqatigiinninnissara avaqqunneqarsinnaanngitsutut isigaara, taamaattumillu ataatsimeeqatigiinnerit oqaloqatigiinnerillu torersut ippassaq pipput, Aatsitassanut Naalakkersuisoq, Ove Karl Berthelsen Radioaviisimut oqarpoq.

Inatsisissatut siunnersuutit Inatsisartuni aqagu aappassaaneerneqarlutik oqallisigineqassapput.