Suliaq nuanniitsoq: Kommunip sulisui 20-kkaat arlallit missaanniitttut soraassapput

Qaammatip aappaata affaa qaangiuppoq KNR-imit oqaluttuarigatsigu Avannaata Kommuniata borgmesteria Palle Jerimiassen siuttoralugu kommuni 18 million koruuninik sipaarniarluni aallartittoq.  

Karsimiit akiliisinnaasuseq minnerpaaffimmiittoq pissutigalugu sipaarniartoqanngippat, kommuni ajornartorsiulertussanngortoq, borgmesteri taamani oqarpoq, erseqqissaatigalugulu innuttaasunik sullissinermi sipaarniuteqarneq malugineqangaarnavianngitsoq. 

Ilumullu taamaannersoq piffissap takutikkumaarpaa.

Borgmesterip ullumi nassuerutigaa sipaarniutissat amerlanerujussuusut. Tamanna kommunalbestyrelsep immikkut ittumik ataatsimiinnerani ataasinngormat ataatsimiissutigineqarpoq. Kommuni sipaarfissanik 18 millioninik allanik missingersuusiami ujarlertariaqalerpoq, kommunaldirektørillu Nick Nielsenip oqarnera naapertorlugu sulisut ikilisariaqassapput.

- Atorfiit aallaqqaammut 50-it pineqarput. Pisortatut aamma kommunip sulisuisut atorfiit pineqarput, ilinniagarisimasat apeqqutaatinnagit, Sermitsiaq.AG-mut oqarpoq.  

Sullissineq ajornerusoq

Pilersaarutaalersorlu borgmester Palle Jeremiassenimit KNR-imut uppernarsarneqarpoq. 

Soraarsitsinissat pinngitsoorneqarsinnaanngillat, akissarsianut aningaasartuutit qaffasippallaaqimmata. 

- Taanna suliaq massakkut aallartereernikuuarput suliarlu taanna kattuffiit suleqatigilluinnarlugit inuillu pineqartut taakku peqatigilluinnarlugit suliaq ingerlapparput, borgmesteri oqarpoq.

Avannaata Kommunia katillugit 36 million koruuninik sipaartussanngorpoq. Amerlaqaat, kommuneqarnernik ilisimarusaatilik Roger Buch oqarpoq.

- Innuttaasut arlaatigut – sipaarniarneq taama atsigisoq – maluginngitsoornavianngilaat, sullissineq ajorseriassammat, oqarpoq.

Nangillunilu oqaatigaa, kisitsit taaneqartoq malillugu sulisut 80-it soraarsitaasinnaassasut. 

Kommunip sulisuminik 50-inik 80-inilluunniit soraarsitsigaluarpat tamarmik innuttaasut sullinneqarnerannut kingunerlussasoq, kommuninik ilisimatusaateqartup oqaatigaa.

Aningaasat atukkat kommunimik ingerlatsisuupput

Immaqa eqqarsartoqarpoq ima: Sooruna arlaatigut sipaarniuteqaannanngitsut? Tassunga pissutaanerpaavoq sulisoqarnermut aningaasartuutit amerlanerpaammata, Roger Buch nassuiaavoq.

Kommunalbestyrelsep ataatsimiinnerata imaqarniliornerani paasinarsivoq – 18 million koruunit qaammatip aappaata qeqqata matuma siornagut sipaarutissatut aalajangikkat naammanngitsut sipaarutissallu amerlisariaqartut, taamaanngippat kommunip karsia ukiup naanerani 30,8 million koruuninik sipporneqarsimassammat.

Roger Buchillu 30,8 million koruuninik amerlavallaarnerarpai. 

- Kommunimut sorlermulluunniit atuuttoq tassaavoq kommunip karsiata imaqartuarnissaa, aalajangersakkat malillugit amerlassusilinnik. Minusi angoqqusaanngilaq, taamaattoqassappat kommuni aningaasanik attartornikkut ingerlalissammat. Aamma kommunit napaannarniarlutik bankimit ukiut tamaasa atorniaqqusaanngillat.

Atukkat erloqinaqaat

Kommunip massakkorpiaq inissisimanera 1-imiit 10-mut nalilissagukku qanoq ippa? 

- Angeqaaq nuanneranilu, immaqa 7-8-miippoq. Anguniagassaqarpugut, annernassaarlu.

Kommunip karsia nakutigisimanngilisiuk?

- Kommunip karsia minusimut qanilliartortillugu missingersuusiat allanngortittariaqarput sipaarfiusinnaasunillu toqqaalluni. Oqaatigisinnaavarput, aggersoq sillimaffigiinngitsoorsimagipput.

Kommuni avataani pisutigut aamma eqqugaasinnaasarpoq, imaassinnaavoq meeqqat, ilaqutariinni ajornartorsiutit pillugit, ikiorserneqartariaqalersut.

Avannaata Kommunia siorna 38 million koruuninik sippuivoq, aningaasanngorlugit 38 million koruunit, taakkunannga 17 million koruunit meeqqat qulingiluat angerlarsimaffiup avataanut inissittariaqalernerannut tunngasuupput.