Politikki

#IQ2018 Sulerusussuseq iliuuseqarfigineqartariaqarpoq

Suliffimmik paarsilluarsinnaaneq sulerusussuserlu nunatsinni iliuuseqarfigineqartariaqarpoq. Aalisarnerup inuussutissarsiutaanera naammattunillu sulisoqarnissaq qanoq iliuuseqarfigineqarsinnaanerannut akissutit ilaat taama nipeqarput.

Allattoq Anton Gundersen Lihn

apriilip 17-at 2018 07:29

Nutserisoq Ane-Marie Petersen

Aalisarneq pillugu partiit arfininngormat KNRTV-kkut toqqaannartumik oqallinnerup qallunaatuuani sulisussaaleqisarnerup iliuuseqarfigineqartariaqarnera isumaqatigiissutigaat.

Aalisakkerivinni sulisussaaleqisoqarpoq. Sulisussaaleqinerullu ajornartorsiutaanera Royal Greenlandip asiameersunik 27-nik tikisitsereernerata kingorna oqallisaaqqilerpoq.

Politikerit qinersinissaq sioqqullugu KNRTV-ikkut toqqaannartumik aallakaatinneqartumik arfininngormat sulisussaaleqineq oqallisigaat. Tamannalu pillugu Sara Olsvig ima oqarpoq:

- Suliffimmik paarsilluarsinnaaneq inuiaqatigiinni ammasumik eqqartortariaqalerparput, tamannami ajornartorsiutaavoq. Kattuffiit suliffeqarfiillu peqatigalugit oqallittariaqarpugut politikkikkullu iliuuseqarfiginissaa qunugissanngilarput.

Partii Naleqqamit isumaqatigineqarpoq. Sulisartunut sulerusutsitsilersussamik aalisarneq pillugu politikkikkut sinaakkusersuisoqartariaqartoq, Pele Broberg isumaqarpoq.

- Aalisarnermi inuussutissarsiutit suliffigiumaneqarusuttunngorlugit aaqqiisariaqarpugut, nunattami nappatigaa.

Aalisarnerlu aningaasarsiorfittut pingaarnertut isigineqartariaqarpoq

- Aalisarnerup inuussutissarsiutaanera tanngassimaarutinngortittariaqarparput. Takornariaqarneq, aatsitassarsiorneq allarpassuillu oqaluuseriuarpagut, aalisarnerli pinnagu. Tamannali maannakkorpiaq inuussutigaarput.

Naalakkersuisuni siulittaasup kingulliup Siumumeersup Kim Kielsenip sulerusussuseq aamma eqqartorpaa, taassumunnga sulerusussuseqalersitsinissaq ilaatigut ilinniarnissamik neqerooruteqarnikkut anguneqassalluni.

- Ilinniarsimanngitsut ingerlariarteqqittariaqarpagut. Isertitaat qaffanniassavagut ilinniarnissamullu periarfissaqalersillugit. Soorlu aalisanngiffiup nalaani Royal Greenland Academytut ittuni pikkorissartitsinikkut. Taama ittunik aaqqissuussiuassaagut taavalu aamma sulinissaq kajuminnartuutittariaqarparput.

Akileraarutikinnerulerneq isertitakinnerusunulluunniit akunnattumillu isertitalinnut sulinermut ilanngaateqartitsinikkut sulerusussuseqarlersitsinissaat partiit aamma oqallisigaat. Sulinermut atatillugu illoqarfimmut allamut suliartorsinnaanerup pitsanngorsaavigineqarnissaa Niels Thomsenip Demokraatineersup iliuuseqarfigerusuppaa, soorlu suliffissaqarfiusuni inissialiortitsinikkut.

Aalisarneq pillugu arfininngornermi apriilip 14-iani oqallinnerit uani isiginnaarsinnaavatit:

Kalaallisut

Danskisut