Suleqatigiissitsisut unnussiuaarnerat: Neriulluarniarneq ataqatigiinnerlu

Allaatigisaq oqaluttuartoq

20.45: Partiip qinersinermi unnussiorneraniit ikinngutigiit nereqatigiinnerannut eqqaanarneruvoq. Malinnaaffigisariaqartunilli pisoqarneranut uppernarsaatitut TV Nuutoqqami kaffisorniartarfinnguami Toqqorsivimmi ikumavoq. KNR 2, qinersinerup unnukkua toqqaannartumik qallunaatut oqaasertalersorneqartoq isiginnaarpaat. 

Inuit arfineq pingasut nerrivik ungalusimavat, Suleqatigiissitsisut Partiiata ilisarnaata, umimmak aappalungusersoq, iikkani tamani takussaavoq, immiartorfinnilu Qajaq-mik immiaaraqarluni.

- Qasulilaarpugut nuannaaqaagulli, Tillie Martinussen oqaluttuarpoq. 

Unnussioqatissaqalerput. kaffisorniartarfimmiunngitsoq, kisianni facetimikkut, partiip qinigassanngortitai marluk sinerissamit allamiit takkummata. Ilulissaneersoq Franz Nielsen aamma Kim Lyberth aalateriffigalugillu suaartarneqarput.

- Palle sianeqqammerpoq, Narsarsuarmigooq marlunnit taaneqarpunga. Tillie Martinussen-iuna oqaluttoq. Unnussiuaaqatigiinnguit nuannapput. Kasuuttarput.

AAMMA ATUARUK Qineqqusaarneq pikkunarsimavoq

Partiip siulittaasua isumalluarpoq, partiillu qinersisai maannamut marluusut, qinersivinnit mikisuneermata, partiip nukittuffiginngisaanit.

Inuit marlussuit takkupput. Kissaatigineqarmat TV nipikillineqarpoq, kaffisorniartarfiullu piginnittaa nipilersukkamik appippoq. Pink erinarsorpoq, What about us atorlugu. Erinarsugaq taannarpiaq USA-p præsidentia, Trump, pillugu Pink erinarsuusiarimmagu kikkullu tamarmik inissaqartariaqarnerannut tunngammat, tulluuteqisoq Tillie oqaluttuarpoq.

Qinersinermit kisitsisinik takkuttoqaqqippoq, inimilu nuannaajummerneqaqippoq kasuuttoqaqqipporlu. Tillie taaguunneqaqqissimavoq.

- Aammami marlunnik isertitaqassagaluarutta, taakkualu arlaannaalluunniit siulittaasuunngippat, pisoq pitsaassaaq, Michael Rosing oqarpoq.

Siulittaasullumi

AAMMA ATUARUK Qinersinermi ajugaasut ajorsartullu

marlunnik ilasortaatitaqalernissaq neriuutigaa. Qinersisartunik isumasiuinerit upperivallaanngilai, inuillu Suleqatigiissitsisullu Partiiat Inatsisartunut ilaasortaatitaqalissanngissasoralugit, partiimut qinersinngitsoorsimasinnaanerat ernumagilaarlugu.

Michael Rosingimut ilaasortanngornissaq apeqqutaanngilaq. Sunniuteqarnissaruna pigaa. Eqqarsalaarpoq oqaluttuarlunilu, imminut tunuatungaanut inissilluni politikkimik ilusilersuinisaq maannakkutut siuttuunermit naleqqunnerusoq.

- Tillie soqutiginarneroqaaq, Michael Rosing oqarpoq.

- Tamanna upperinngilara, Tillie Martinussen nerriviup illuaniit suaarpoq.

Illarput tamarmillu arlartik qinersiseqarnerpaassasoq qularutiginnginnerarlugu. Michael eqquiguni igaallerfigineqarumasoq, Tillie eqquiguni tiillerfigeqquvoq.

Isersimasut qiimmannerupput, Kangerlussuarmilu 22-nik qinersiseqarnertik ersermat isumalluarneq malunnaqaaq.

- Pissanganaq, ataaseq oqarpoq. Tamanna naatsorsuutiginngikkaluarparput, alla oqarpoq.

Nalunaaqutaq 04:45: Inernerit kingulliit qinersineq.gl-ikkut saqqimerput. Kisitsisit takutippaat, partii ataatsimik Inatrsisartuni inissaqalertoq, tassaTillie Martinussen, siulittaasup unnummi siusinnerusukkut siulittuutigisaatut, ilaasortanngormat.