Suleqatigiinneq nutaaq atorlugu sunniuteqarneruniarput
- Savalimmiormiut ataatsimiititaliami ilaasortaajumallutik imaluunniit suliniummik kissaateqassappata, taava suleqatigiiffitsinni suliniutigissavarput, ilisimassavaallu Kalaallit Nunaannit Ålandimiillu tapersersorneqarlutik nunanut allanut ilaasortaasunut saqqummiunneqarumaartoq, Ilinniartitaanermut Naalakkersuisoq Palle Christiansen nunani avannarlerni suleqatigiiffik pillugu taama oqarpoq.
Kalaallit Nunaat nunat avannarliit siunnersuisoqatigiivinut akiliuteqartannginnami taaseqataasinnaatitaanngilaq, taamaasillunilu siulersuisunut assigiinngitsunut ilaasortalersuinermi oqartussaaqataanani. Tamannalu annaasaqaatigisarpaa.
- Soorlu Nunani avannarlerni ilisimatusarnermi suliniuteqarfik Nordforsk. Taassuma siulersuisuinut Ålandimiut Savalimmiormiullu ilaasortanngornissaminnut periarfissaqartarsimanngillat, taamaasillutillu nunani namminersortuni ilisimatusarnikkut aningaasaliissutinik suliniutinillu pissarsiaqanngitsoortoqarpoq. Itigartitaajuarlutillu. Nunani avannarlerni suleqatigiiffitsinni tamanna anguniarsinnaavarput, Ilinniartitaanermut Naalakkerusuisoq Palle Christiansen oqarpoq.
Nunani avannarlerni siunnersuisoqatigiit ataatsimiinnerisa nalaani, Kalaallit Danmarkimi qaffasinnerusumik ilinniagaqarusuttut pillugit Ilinniartitaanermut Naalakkersuisoq Palle Christiansen aamma Danmarkimi Uddannelsesministeri Morten Østergaard isumaqatigiissuteqarput. Tassa kalaallit oqaasii nunani allamiut oqaasiisut akuerineqarput.
Danmark-imi inuiaqatigiinut tunngasunut ilinniarfinni, tassa bachelor-itut ilinniarnerit amerlanertigut piumasaqaatigaat, ilinniarnertuunngornermi tuluttut karakter–i B anguneqarsimassasoq, taassumalu saniatigut nunat allamiut oqaasiinik ilinniagaqarsimanissaq, taamaasillunilu kalaallit oqaasii nunat allat oqaasiitulli ilinniagassatut akuerisaallutik inissisimalertussanngorput.
