Sukkut akitsuutaarutsinnerata paatsuunganarnera – naalakkersuisumit allaat paatsuungassutigineqartoq
![](/sites/default/files/styles/image_934x467/public/2023-05/DSC05806.jpg?itok=PU8suvsP)
Sukkunut akitsuut ukiup nikinnerani atorunnaarsinneqarmat pisiniarfimmi nioqqutissat arlallit akii apparparput; Sioraasat, sioraasat kajortut, flormelis, sirupillu assigiinngitsut.
Nioqqutissalli akikillineqartut amerlasuunit naatsorsuutigineqartunit ikinnerungaatsiarput.
Ítupaluk Mikiassen KNR-ip Brugsenimi sapaatip akunnerani matumani naapitaata ilaat naatsorsuuteqarsimagaluartut ilagaat.
- Tassami aamma ilaa ullaakkorsiutit sukkoqartarmata soorlu aamma tamakku akikillineqassagaluartut.
Atuisartulli kisimik paatsuunganngillat. Politikerit akornanni sukkunut akitsuutip atorunnaarsinneqarneranut atatillugu paatsuungasoqarnera paasinerluisoqarneralu aamma ersarilluinnarpoq.
Inuit Ataqatigiinnit Inatsisartunut ilaasortaq, Peter Olsen Facebookikkut ilaatigut ima allappoq:
- Sukkunut akitsuutip peerneqarnissaanut siunertaasoq tassaavoq; noqqutissat inuussutissartallik amerlasuut sukkoqartut, assersuutigalugit ullaakkorsiutit allarpassuillu, niuertarfinnit akikillineqarsinnaanissaat.
Allaat naalakkersuisup aalajangiinermut akisussaasuusup – tassa aningaasaqarnermut akileraartarnermullu naalakkersuisup, Erik Jensenip (S) – nioqqutissat sorliit sukkunut akitsuummut ilaanersut aamma paatsuungassutigisimavai.
Erik Jensenip KNR-imit sapaatip akunnerata siuliani apersorneqarnermini akitsuutip atorunnaarsinneqarnera nioqqutissanut arlalinnut akikilliisinnaasoq oqaatigaa.
- Tassa assigiinngitsorpassuupput sukkut, taamaattumik oqaatigiuminaappoq sorlerpiaassanersut, kisianni oqareernittuut sikuniusinnaavoq, imeruarsaatiniissinnaavoq assigiinngitsorpassuarnilu, naalakkersuisoq januaarip 16-iani oqarpoq.
Erik Jensenili apersorneqarnermi aqaguani nioqqutissat eqqaasani pillugit naqqiissuteqarniarluni saaffiginnippoq.
Taamaammat naalakkersuisoq nutaamik nassuiaanerusumillu apersorumavarput.
Nioqqutissat allattorsimaffiat piginngikkaa
Erik Jensenilli aappassaanik apersorneqarnerata kingunerani nioqqutissat sorliit sukkunut akitsuutip atorunnaarsinneqarneranut ilaanersut ilisimanerat ersarinngilaq.
Aalajangiussaq nalupajaarlugu aalajangertoqarpoq una piisooq?
- Nalupajaarlugu aalajangertoqanngilaq. Taanna erseqqissaatigissavara, kisianni innersuussutigineqarpoq una siullertut aamma illerngit assigiinngitsut iliuuserineqarput, aamma nioqqutissat allat assiginngitsut akitsuutillit taakkua nalilersuiffigineqarsinnaanissat mattussuunneqanngilaq, kisianni aamma akuersaartutut nipeqartinniarneqassanngilaq, kisianni nalilersuiuartarnissaq taanna pingaaruteqarpoq innuttaasut atugaasa pitsanngorsarnissaat tunngaviusumik isumarigatsigu, naalakkersuisoq oqarpoq.
Kisiannimi illit qullersaavutit, illit, tassami siunnersuuteqarputit, akuerineqarpoq. Nalusussaanngikkaluarpat suut akuerinerlugit, akitsuutaajarneqartussat ukua pillugit?
- Isumaqartoqassanngilaq suna suliarisimallugu ilisimanagu suliaqarsimasunga, aamma taanna ilumuunngilaq. Taama nipeqartinneqarniassanngilaq.
Taava illit nalusimassanngikkaluarpatit aamma?
- Soorunami, taakkua kisianni listi paarinnginnakku tassani apersorneqarninni suut apeqqutigimmagit. Taamaattumik akisinnaanagu oqarfigivara: akiuminaatsippara. Taamaattumik imaanngilaq sianiginnginnakku suna suliaralugu taamatut nipeqartinneqarniassanngilaq.
Erik Jensenip oqarnera naapertorlugu sukkunut akitsuutip atorunnaarsinneqarnera innuttaasut niuerniarnissaannut oqilisaanissaq siunertaavoq.
- Naalakkersuisuninngaanniit ukua (sukkut sirup aaqq.) innersuussutigineqarput tiguneqarsinnaasut akitsuutit sukkasuumik peerneqarsinnaasutut innersuussutigineqarlutik, taanna oqarpoq.
Nioqqutissallu sukkoqartut, assersuutigalugu ullaakkorsiutit pineqanngitsut, taassuma maanna erseqqissaatigaa.
- Taanna immikkut varegruppimi akitsuuteqarami taamaattumik aamma taanna immikkut annertunerusumik naleqarami, Erk Jensen oqarpoq.
Tamannali eqqortuunngilaq.
Ullaakkorsiutikujuit akitsuuteqanngitsut
Akileraartarnermut Aqutsisoqarfiup nioqqutissanut nunatsinnut eqqussanut akitsuutit niuertarfinnit pisiniarfinniillu akilersittarpai
Taakkulu nioqqutissat sorliit akitsuutinut assigiinngitsunut ilaatinneqarnersut tamakkiinerusumik ilisimasaqarfigaat.
Akileraartarnermut Aqutsisoqarfiup assersuutigalugu ullaakkorsiutit, ketchupit iffiallu sukkumik akoqangaatsiartut sukkuinut akitsuuteqartinneqanngitsut KNR-imut paasissutissiissutigaa. Sukkunut akitsuut sukkunik nioqqutissanuinnaq, soorlu sioraasanut, melisinut sirupinullu maanna aamma akikillineqartunut atuuppoq.
Mamakujuit soorlu vingummit, sukkulaatit, tyggegummit akitsuummi allamiipput – tassa mamakujunnut akitsuut – taamaalillutillu sukkunut akitsuummut ilaanikuunatik. Sodavandinut akitsuutit aamma taamaapput, taakku sodavandinut akitsuutip puiaasanullu akitsuutip ataaniipput.