Nuummiut sukkut akiisa appariartornerat pillugu: Ajunngilaq, nioqqutissalli amerlanerusut akikillisikkusukkaluarpaat

Naalakkersuisut sukkunut akitsuut atorunnaarsippaat, pisiniarfiillu nioqqutissat soorlu sioraasat, glukose, sirupillu akii appareerpaat.

Akitsuummilli atorunnaarsitsineq sodavandinut, mamakujuttunut, iffiaq qaqortunullu aamma sukkumik akoqartunut atuutinngilaq.

KNR Nuummi pisiniarfinnukarluni akit nutaat pillugit inunnut tusarniaavoq.

Akitsuutip atorunnaarsinneqarnera amerlasuut nuannaarutigaat. Nioqqutissalli amerlanerusut akikillinissaat kissaatigigaluarpaat.

Miyuki Daoranap sukkut atorneqarajummata sukkunut akitsuutip atorunnaarsinneqarnera nuannaarutigaa. Assi © : KNR / Gaaba Olsen

Miyuki Daorana

Sukkunut akitsuut atorunnaarsinneqarpoq. Qanoq isumaqarfigaajuk?

- Qujanarmi akikillisimasut.

Qanoq ilinnut sunniuteqartigissasoraajuk?

- Sumulluunniit atorneqartaramik soorlu kaffi tii, aamma kaffisortitsisuaannaratta uagut iluarissavarput, aamma kaagilioraangatta atortaratsigit.

Sukkuinnaat akikillineqarput qanoq eqqarsarpit?

- Immaqa sukkut pingaarneraat ilaagamik, ilaa soorlu sioraasat. ajunngilaq.

Ítupaluk Mikiassenip assersuutigalugu ullaakkorsiutit akikillinnginnerat pakatsissutigaa. Assi © : KNR

Ítupaluk Mikiassen

Akikillinerat qanoq maluginiarpiuk?

- Ukioq manna aatsaat pisiniaratta eqqanaareernikuugatta. Uani akii takugatsigit affaannapajaarsuarmik akeqalersimasut iluassaqaat.

Sukkuinnaat akikillineqarput allat sukkullit akitsoratik qanoq naatsorsuuteqaraluarpit?

- Tassami aamma ilaa ullaakkorsiutit sukkoqartarmata soorlu aamma tamakku akikillineqassagaluartut.

Pakatsivit?

- Pakatsilaarpunga

Oline Jessenip nioqqutissat nalinginnaasumik akitsoriartorsorai, nioqqutissanilu amerlanerusuni akitsuutit atorunnaarsinneqarnissaat kissaatigigaluarpaa. Assi © : KNR

Oline Jessen

Aamma Oline Jessenip akitsuutip atorunnaarsinneqarnera qanoq sunniuteqassanersoq eqqarsaatigisimavaa.

- Sukkut uku akitsuutaat peerneqarneri nuannit, qanorli aamma mamakujuttortaat assigisaallu akitsuutaat peerneqartuuppata.

Sooruna?

- Suna tamarmi akitsorami aamma akisoqigamik.

Sukkuinnaat akikillineqarput allat sukkullit akikillinatik, qanoq naatsorsuuteqaraluarpit?

- Aamma taakkua akitsuutaat peerneqartuuppata nuannissangaluarpoq. pisiassat ukioq aallartippoq suna tamarmi akisoreerami aamma nuannissangaluarpoq suna tamarmi appartuuppat sukkuinnaanngitsut assigisaalu.