Suka aamma Muté: Greenpeace akulerussuivoq
Avatangiisinut naalakkersuisoq Suka K. Frederiksen aamma aatsitassanut naalakkersuisoq Múte B. Egede taama isumaqarput. Taamaammat avatangiisinik illersuiniaqatigiiffik oqaloqatigiinnissamut qaaqquaat.
Greenpeacep Danmarkimi immikkoortortaqarfiata sapaatit-akunnerata siuliani nalunaarutigaa, Nunatta imartaani 3 sømilinik killeqarfiup iluani mingutsitsoqassagaluarpat naalagaaffiup upalungaarsimasussaatitai ikiuutissappata Danmarkip Nunatsinni aatsitassarsiornermik suliniutit aalajangeeqataaffigisinnaasariaqarai.
Tamanna avatangiisit pillugit isumaqatigiissummi 1989-imeersumi Danmarkip Nunattalu nutarteqqammigaanni aalajangersarneqarpoq.
AAMMA ATUARUK Isumaqatigiissutip Danmark aatsitassanut politikkimut sunniuteqartittariaqaraluarpaa
Isumaqatigiissulli Nunatta imartaani avatangiisinik mingutsitsinermut Nunatta akisussaaffianik allanngortitsinngitsoq, politikerit tusagassiorfinnut nalunaaruteqarlutik erseqqissaatigaat.
Ilanngullugu oqaatigaat ingerlatseqatigiiffiit Nunatsinni uuliasiortut avatangiisini ajornartorsiutinik sunilluunniit iliuuseqarfiginninnissamut naammattumik upalungaarsimasuutitaqareertussaasut, aammalu aningaasaqarnikkut annertoorujussuarnik qularnaveeqqusiisussaasut, aningaasartuutit imaluunniit ajoqusiinerit ingerlataasa malitsigisimasinnaasaasa, inuiaqatigiinnut imaluunniit innuttaasunut nanertuutaannginnissaannik qulakkeerinnittumik.
- Taamaaliorsinnaanngippata Kalaallit Nunaanni suliaqarnissamut akuerisaassanngillat, Suka K. Frederiksen aamma Múte B. Egede tusagassiorfinnut nalunaarumminni taama allapput.