Naalakkersuisoq: Demokraatit isornartorsiuiaarpallaarput
Siulittaasoq siulittaasullu tullia naalakkersuisoqatigiinninngaanneerput. Taamaammat illuatungiliuttut sunneeqataasinnaanavianngitsut, innuttaasunullu ataatsimiititsinerit qineqqusaarnertut atorneqassasut, Demokraatinit ernumassutigineqarpoq.
Illuatungiliuttullu peqataatinneqarnissaat Naalakkersuisut neriorsuutigisinnaanngilaat, Suka K. Frederiksenilli ilaasortaasut tamarmik peqataatinneqartassasut naatsorsuutigaa.
- Isumalioqatigiissitami ilaasortat tamarmik peqataasassasut naatsorsuutigilluinnarpara. Naalakkersuisuninngaanniit taamatut pisoqartassasoq kaammattuutigaarput. Taamaakkaluartoq nammineq aalajangersaanissaq isumalioqatigiissitap pisinnaatitaaffigaa, taannalu naalakkersuisutut ataqqisassarivarput, Suka K. Frederiksen oqarpoq.
Demokraatineersup Michael Rosingip paragraf 37 atorlugu apeqqutaanut akissutini taamaasilluni uterpaa.
Michael Rosingillu taama akineqarnini eqqississutigivallaarnagu oqaatigaa.
AAMMA ATUARUK Namminerisamik tunngaviusumik inatsiseqalernermi tapiissuteqartarneq unissaaq
Isumalioqatigiissitallu siulittaasoqarfia, Siumumit Inuit Ataqatigiinniillu inuttaqartoq, kisimiilluni innuttaasunut ataatsimiititsisassappat partiit anginersaat marluk isertorlutik qineqqusaarnissaat Rosingip ernumassutigaa.
Partiillu illuatungiliuttut sunniuteqaqataasinnaanerat killeqarnerulissasoq, Rosingip aamma aarleqqutigaa.
Siusippallaartumilli ernumasoqartoq Suka K. Frederiksen isumaqarpoq.
- Suliassat imminnut maanna siorngerpai. Suliluunniit aallartinngitsoq qanoq issasorisamik aallaavilimmik maanna oqalulerpugut, Suka K. Frederiksen oqarpoq.
Demokraatillu isumalioqatigiissitamut ilaasortaatitassaminnik innersuussaqarnissaminnut periarfissinneqareermata, mattussiniartoqannginneranik takussutissaasoq Suka K. Frederiksenip aamma oqaatigaa.
Isumalioqatigiissitamili ilaasortassat sunik suliaqartassanersut paaseqqaartinnagu innersuusserusunnatik Demokraatit nalunaarutigereerpaat.
AAMMA ATUARUK Inatsisit tunngaviusut pisoqalisoorutigineqarlutik ajornartorsiutaalersinnaasut
Illuatungiliisoqarnani innuttaasunut ataatsimiisitsisoqarsinnaassappat, innuttaasunut puussaarisoqalersinnaasoq, Tuluit Nunaannilu EU-mit ilaasortaajunnaarnissamut taasititsinermik piumasaqalernermut assingusumik Nunatsinni pisoqarsinnaasoq, Michael Rosingip aamma aarleqqutigaa.
Namminiilivinnermilu naalagaaffimmiit tapisiat tunniunneqartarunnaarpata, atugarissaarnermut tunngasut ajorseriarujussuassasut Demokraatit ernumagaat.
Suka K. Frederiksenilli innuttaasunik taasititsinissamut periarfissaq itigartinngilaa.
- Naalakkersuinikkut sulineq tassaavoq innuttaasut oqaat. Innuttaasut oqarunik taamaassaagut, taava qinikkat taamaaliussapput. Taasunga apuunnissamut aqqusiussapput, namminiilivinnermut naalakkersuisoq, Suka K. Frederiksen taama oqarpoq.
