K aamma S: Namminerisamik tunngaviusumik inatsiseqalernermi tapiissuteqartarneq unissaaq

Malugiuk: Det Konservative Folkepartiimeersoq Rasmus Jarlov aamma Socialdemokraatineersoq Karin Gaardsted, Vittus Qujaukitsup Danmarkimik isornartorsiuinerata aviisimi Politikenimi decembarip 13-iani 2016-imi saqqummiunneqannginnerani apersorneqarput.

Kalaallit Nunaat nunami naalakkersuinikkut aaqqissuussissappat naalagaaffiup tapiissutai qanoq pineqassanersut Naalakkersuisut isummerfigerusunngilaat.

Aningaasaqarnermut naalakkersuisup Aqqaluaq Biilmann Egedep Randi Vestergaard Evaldsenimut akissutaa taama nipaqarpoq.

Danmarkimili Socialdemokraterne imaluunniit Det Konservative Folkepartiit naalakkersuinikkut aaqqissuussissappat Kalaallit Nunaannut akilersuiumanngillat.

Kalaallit Nunaat tunngaviusumik inatsisip avataatigut naalakkersuinikkut aaqqissuussissappat - soorlu maannakkut politikkikkut angunigaasoq - taava naalagaaffiup tapiissutigisartagai atorunnaartariaqassapput.

Konservativit Nunarput pillugu oqaaseqartartuat Rasmus Jarlow taama oqarpoq.

- Namminersortuugaannimi taamaappoq, Danmarkimi nunanut allanut namminersortunut akilersuisanngilaq, taamaallaat nunanut piitsunut ineriartortunut tapiisarpugut.

Paragraf 37 naapertorlugu Demokratep Randi Vestergaard Evaldsenip aningaasaqarnermut naalakkersuisoq Aqqaluaq Biilmann Egede aperivaa naalagaaffik tapiissuteqaannassanersoq Kalaallit Nunaat Danmarkimiit avissaarpat.

Tassani akissut ima nipaqarpoq: "Apeqqutip akineqarnissaanut tunngavissaqanngilanga."

Konservativilli tassunga akissutissaqarput:

- Kalaallit Nunaat namminersortunngoraluarpat akilersuiinnarnissarput danskit akileraartartuinut  paasitissinnaanavianngilarput. Aamma Kalaallit Nunaat Danmarkimut atajunnaarluni namminersulissappat imaluunniit arlaatigut tapiiffigineqartarneq ingerlatiinnarniarlugu iliuuseqaraluarpat.

Konservativilli Socialdemokratiillu kalaallit naalakkersuinikkut aaqqissuuserusunnerat tapersersorpaat.

Socialdemokratiilli namminersortumut tapiisaannarnissaq aamma akerlerigaat oqaaseqartartoq Karin Gaardsted oqarpoq.

Kalaallit Nunaanni Danmarkip tapiissutai maanna pinngitsoorneqarsinnaanngillat. Tamannalu pillugu kalaallinut oqaannarsinnaanngilagut kinaassuseq tunngaviusumilluunniit isummat kisiisa eqqartorusuppagut, aningaasaqarnerli ilaavissuummat aamma ilannguttariaqarpoq.

Ministeriunerup Lars Løkke Rasmussenip arlaleriarluni oqaatigisareerpaa Kalaallit Nunaat namminersortunngoruni Danmarkimiit aningaasaqarnikkut kiffaanngissuseqalerumaartoq.

Partiilli SF aamma Alternativet Kalaallit Nunaat naalakkersuinikkut aaqqissuusigaluarpalluunniit naalagaaffimmit tapiissutisisarnera ingerlatiinnarusuppaat.