Suinnip nulia qaartartut nakkarmata Kievimiippoq: Qularnanga oqaatigisinnaavara inuutillunga aatsaat taama ernumatigigama
Ruslandip Ukrainimut tiguaanera nunatsinniit mobiilikkut nutaarsiassatigullu malinnaaviginerani ungasissumi pisutut misinnarsinnaapput.
Pisulli kalaaleqatitsinnut Suinni L. Johansenimut qanittuararsuupput. Taassumami nulia Ukrainip illoqarfiisa pingaarnersaaniinnerata nalaani russit saassussipput.
- Qularnanga oqaatigisinnaavara inuutillunga aatsaat taama ernumatigigama. Qanoq pisoqarnerani qanorlu susoqaratarsinnaaneranut. Aamma aallaqqaammut pissarsiarineq ajuleqqaaraluarakku.
Suinni L. Johanseni ippassaq ullaakkut iterami annilaarsimaqaaq.
AAMMA ATUARUK Politikerit Ukrainimut saassussineq pillugu: Sorsunnermiit ungasissorujussuarmiittutut eqqarsassanngilagut
Nutaarsiassat ajortoqavitsillugu sungaartumik qalipaasikkanik qulequtsikkat imaaginnavipput. Ruslandip Ukraine tiguarpaa.
Suinni L. Johansenip nulia Ukrainimeersuuvoq, taannalu illoqarfiit pingaarnersaanni saassussineq pimmat Kievimiippoq.
- Assut ernumaammerujussuarpunga nuliaralu pissarsiariniarsaralugu. Paasissutissanik pissarsiniarsarivunga massakkorpiaq susoqarneranik, kisianni ungasianiit paasissutissat pineqarsinnaasut killeqarput.
Suinni L. Johansen Malmømi najugaqarpoq, Københavnimi atorfeqarluni.
Polenimut ingerlaartoq
Russit sakkutuui Ukrainimut sisamanngornerup ullaassaani tiguaaniarlutik qaartartumeeripput.
- Nuliama taakaniinnerani najummatsisimarujussuarneq ippassakkunni atugarivara. Kisianni ullaaq-manna qimuttuitsorluni Ukrainip kujataatungaatigut ingerlaarluni Polenimut massakkut apuukkiartuaarpoq.
Ernumaneranili peerallarunnanngilaq. Angerlarsimaffimmimi aappaani sorsunneq aallartippoq.
- Eqqissiallakkiartuaarpugut soorunami. Kisianni suli ernumaqaluta malinnaavugut Ukrainimi ikinngutigut nuliamalu ilaqutai apersortarlugit qanoq innersut, 00:02:03Suinni L. Johansen oqarpoq.
Ane-Marie Petersen Signe Haahr Pedersenilu ilanngutassiortuupput.
Ukrainimi najugaqavittuunngitsut kisimik qimarngutinngillat. Qimaasut 100.000 missaanniittut Ukrainip nunat eqqaaniittunut Moldovamut, Polenimut Rumæniumullu qimarnguttut Naalagaaffiit Peqatigiit qimaasunut qullersaqarfiata UNHCR-ip nalunaarsorpai.