Politikerit Ukrainimut saassussineq pillugu: Sorsunnermiit ungasissorujussuarmiittutut eqqarsassanngilagut
- Ungasissorujussuartut immitsinnut oqaatigiinnarsinnaanngilagut pissaanilissuilli nunat marluk akornanni inissisimavugut, Siumumeersoq Vivian Motzfeldt oqarpoq.
Taanna Nunanut Allanut Sillimaniarnermullu Ataatsimiititaliami siulittaasup tulleraa. Taassuma aarleqqutigaa, Russit Ukrainemut sakkutuulersorlutik saassussinerat nunatsinnut sunniuteqarnerlussinnaanera.
AAMMA ATUARUK Russit Ukrainimut saassussinerat Issittumut annertuumik malunnaateqarsinnaasoq
- Issittumi sakkutooqarfik maanga Nuummut inissinneqarnikuuvoq, tamatumalu malitsigaa, illoqarfiit pingaarnersaanni najugaqarnerup ulorianartutut isigisariaqarnera, Tamakkuupput nalilersoqqitassat pingaarutilerujussuit, Vivian Motzfeldt oqarpoq.
Taamatuttaaq ataatsimiititaliami siulittaasup Jens Napaattuup Naleqqameersup pissutsit taama ilinerat pinartutut isigaa, taassumali nunatta Ruslandimik niueqateqarnera aarleqqutigineruaa:
- Nunarput imaannaanngitsorujussuarmik kalluarneqarpoq aningaasarpassuarnik naleqartumik, soorlu Polar Seafoodikkut niuillaqqillutik torrallaallutik Ruslandimut niuerluartorujussuit tamarmik kalluarneqartussanngorput. Taamaammat imaannaanngitsumut killiffeqarnerput toqqaannartumik danskit naalakkersuisui peqatigalugit aaqqiisariaqarpugut, aaqqinniarnissaalu unammillernartuusussaavoq, Jens Napaattooq oqarpoq.
Apeqqutit akineqarsinnaanngitsorpassuit
Apeqqullu pingaarutilik unaavoq, nunatsinni politikerit Ruslandimut tunisassiornermik ingerlatsiinnarusussanersut.
- Uagut eqqissinermut angertuuvugut, kissaatiginngilarput nunarsuarmioqatigiit sorsunnermik ingerlatsissasut, taamatut pisoqarmat naliliiffigisassat allarpassuit aamma takkupput. Naalagaaffeqatigiinnerup iluanut qiviaraanni, Savalimmiormiut russinut niueqateqarnerat annertoorujorujussuuvoq tamakkuupput nalilersugassanut ilaajumaartussat, tassa nunarsuarmi inissisimanerput, kikkunnik niueqateqarnerput, oqarpoq nangipporlu:
- Massakkoqqissaarli ataatsimiititaliaq sinnerlugu oqaaseqarnissara piaarpallaartutut isigaara, Vivian Motzfeldt oqarpoq.
AAMMA ATUARUK Immikkut ilisimasalik: Ruslandip Ukrainemik tamakkiisumik saassussineratut isikkoqarpoq
Taanna neriuppoq ataatsimiititaliaq piaartumik naapittariaqartoq, qaqugorpiarli tamanna pisinnaanersoq oqaatigisinnaanngilaa, taanna naapertorlugu, ataatsimiititaliami ilaasortat Naalakkersuisunit paasissutissinneqaqqaartariaqarmata.
Vivian Motzfeldtilu ima oqarpoq:
- Naalakkersuisooqatigiit isumaqatigiissutaanni allassimasoqarpoq nunarput sakkulersorluni sorsunnernut peqataassanngitsoq, paaserusunnarpoq Naalakkersuisooqatigiit nunarsuarmi pissutsit pillugit qanoq iliorniarnersoq, tassalu taannaavoq uagut Nunanut Allanut Sillimaniarnermullu Ataatsimiititaliamiit ilisimanngisarput
Mianersoqqissaarluni politikkiliornissaq
Danskillu politikkerii naapikkusukkitsik Jens Napaattooq oqarpoq:
- Nunatsinni naalakkersuisut danskillu naalakkersuisui imminnut paasissutisseeqatigiinnerusariaqarput mianersoqqissaarlutalu niuernikkut nunatta sunnerneqarnera politikkiliuuttariaqarparput, Jens Napaattooq oqarpoq.
