Suiaassuseqatigiinnik katititsinissamut palasi piareersimavoq
Biskop Sofie Petersen suiaassuseqatigiit oqaluffinni katitinneqartarnissaannut isummamut ammanerarpoq, upperisarsiornerup iluani suiaassuseqatigiit akornanni asaqatigiinnut eqqartuussisussaannginnamik.
- Aappariilersinnaanerat ungaserujussuanngilaq uanga eqqarsaatinni, Sofie Petersen oqarpoq.
- Aappariit suiaassuseqatigiittut akornanni asaninneq pilersarpoq, uagut naliliisinnaanngilagut aamma eqqartuussissussaatitaanngilagut, arnat angutillu asanninnerannit allaanerunerusoq eqqartuussiffigisussaannginatsigu, Biskoppi oqarpoq.
Aappariit suiaassuseqatigiittut rådhusini katissimasut maannakkut oqaluffinni pilluaqquneqarsinnaapput, palasip biskoppillu isumaqatigiissuteqarfigineratigut tamanna pisinnaalluni, tamannalu tapersersorlugu Sofie Petersen oqarpoq.
Oqaluffinni pilluaqqusisinnaaneq pillugu biskopit akornanni Sofie Petersen akuersisut ilagaat.
Sisimiuni palasip Isak Davidsenip suiaassuseqatigiit oqaluffinni katissinnaanerat ajoriffissaqartinngilaa. Folketingilu aqqutigalugu suiaassuseqatigiit oqaluffinni katissinaanerat akuerineqassagaluarpat, Isak Davidsenip ajortussaqartinngilaa. Suiaassuseqatigiillutik aappariittut inooqatigiittut ulluinnarni inooqatigilereerpagut, taakkualu akerliuniarfissarinngilagut, namminneq inuunertik taamatut ittussasutut toqqarsimammassuk, palasitut akuleruffiginiartussaanngilagut, Isak Davidsen oqarpoq.
Kalaallit Nunaanni palasit akornanni Isak Davidsen siullersaalluni arnanik aappariinnik siornatigut rådhusimi katissimasunik Sisimiuni oqaluffimmi ukiutoqqami 2009-mi pilluaqqusivoq.
Ilagiit amerlasuut naalagiarneranni pilluaqqusineq ingerlanneqarpoq, tamatumalu kingorna ajorineqarneranik tusarsimanani Isak Davidsen oqarpoq.
Kalaallit Nunaanni innuttaasut paasiartorpaat, suiaassuseqatigiillutik aappariit takussaaleraluttuinnartut amerliartorlutillu, tamannalu aallaavigalugu akerliusunik annertunerusumik tusagaqarneq ajorluni Isak Davidsen oqarpoq.
