Sudanip præsidentia tunuartoq
![](/sites/default/files/styles/image_934x467/public/article_images/omar_al_bashir_al_jazeera_english_flickr.jpg?itok=hhdLe9Ro)
Sudannip præsidentia sorsunnermi pinerluttutut pasisaasoq tunuarpoq, Omar al-Bashir Dafurimi inuiannik toqoraasimasutut Haagimi eqqartuussivimmit 2009-miilli ujaarineqartuuvoq.
Sudannimi sakkutuut nunami aqutsineq nakkutigisarilerpaat Omar al-Bashirilu tigusarineqareersoq, Sudannimi illersornissamut ministeri nalunaarpoq.
Omar al-Bashirip siornali ukioq naalersoq aqutsinera pillugu innuttaasut akerliuffigivaat maannalu tunuartoq nalunaarutigineqarluni.
Nunat tamalaat akornanni tusagassiorfiit taama allaaserisaqarput.
Bashir sakkutuutut ilinnigaqarsimasoq Sudanimi 1989-imi naalakkersuisunik uppititsinikkut pissaaneqalerpoq.
Kisermaassinnilu naalakkersuisutut isigineqarluni.
Innuttaasut Bashirip tunuarnissaa anguniarlugu akerliupput, akerliusullu amerlaqisut toqutaasimallutik.
Sudanni 41 milliuuninik innuttaqarpoq Bashirillu aqutsinerliorneranit peqquserlunneranillu innuttaasut amerlaqisut atugarliorlutik.