Misissuineq: Coronamut akiuussutit ukiumi ataatsimi inunnik 20 millioninik annaassisut
Coronavirusimut akiuussutit ukiup siulliup ingerlanerani atorneqartut inunnik 20 millioninik annaassisimapput.
Misissuinermi inernerit atuagassiami ilisimatusarnermut tunngasunik saqqummiussaqartartumi The Lancet Infectious Diseasesimi saqqummiunneqarput.
Paasissutissat nunanit nunarsuullu immikkoortuinit 185-init aallaaveqarput, paasissutissat 2020-mi decembarip ulluisa arfineq-pingajuannnit 2021-mi decembarip ulluisa arfineq-pingajuannut katersorneqarsimallutik.
Coronavirusimut akiuussusiinerit inuit qassit toqusussaagaluarnerannik toqqaannartumik toqqaannanngitsumillu pinngitsoortitsisimanersut aatsaat misissorneqarpoq.
AAMMA ATUARUK Nakorsaaneq coronamut killiffik pillugu: Aasaanerani ukiarulu tunillatsittut sungiuttariaqarpagut
Coronavirusimut akiuussuteqarsimanngikkaluarpat inuit 31,4 millionit immaqa toqusimassagaluartut immikkut ilisimasallit misissuinerminni paasivaat.
Kisitsisit pisortatigoortut misissuinermi aallaavigineqarput, kisitsisinilluunniit pissarsisoqarsinnaasimanngippat missingersuutit aallaavigineqarsimallutik.
Kisitsisit Kinameersut misissuinermi atorneqarsimanngillat, Kinami innuttaasut amerlassusaat matusinerpassuillu eqqarsaatigalugit suliarujussuussagaluarmat, inernerillu immaqa aamma tutsuiginassusaat apeqquserneqarsinnaassagunaraluarlutik.