- Tunillatsissimasut aasap ingerlanerani amerlangaatsiarnissaa ilimananngilaq. Piffissaq ungasinnerusoq isiginiassavarput, ukiamullu qanoq pisoqarsinnaaneranut piareersarluta.Assi: KNR / Malik Brøns

Nakorsaaneq coronamut killiffik pillugu: Aasaanerani ukiarulu tunillatsittut sungiuttariaqarpagut

Henrik L. Hansenip qaammatini aggersuni tunillatsissimasoqangaatsiarnissaa naatsorsuutiginngilaa. Aasaaneranili sulinngiffeqarnerup kinguneratigut tuniluuttoqaqqilissaaq, ersiutinik malugisaqaqqilernissarput naatsorsuutigissavarput.

Nunatsinni coronavirusimik tunillatsissimasut qaammatini kingullerni ikittunnguupput. Aasaaneranili sulinngiffeqarnerup kingorna nappaat arlaatigut malugeqqilissallutigu naatsorsuutigissavarput.

Nunatsinni ukiuni marlunni takornariaqarpallaanngereersoq nunatta nunallu allat akornanni angalanerit nalinginnaasunngoriartussapput. Kisianni nakorsaanerup, Henrik L. Hansenip pissutsit ilungersunarnissaat naatsorsuutiginngilaa.

- Sumiiffinni assigiinngitsuni aamma nunatsinni tuniluuttoqaqqilersoq maanna takusinnaavarput. Nunatta kujataani aammali sumiiffinni allani maanna tuniluuttoqarpoq. Pissutsit taakku aasaanerani tikittunit tunillaasoqarneratigut allat aamma tunillatsittarnissaat sungiuttariaqarpagut.

- Kisianni ilungersunarnissaa naatsorsuutiginngilarput, pissutigalugu innuttaasut amerlanerpaartaat tunillatsereersimanertik pissutigaluga tunillanneqarsinnaajunnaarnikuupput, amerlasoorujussuillu akiuussusertinnikuullutik. Taamaammat aasap ingerlanerani ilungersunangaatsialernissaa naatsorsuutiginngilarput.

Nakorsaanqarfiup coronavirusi maanna siusinnerusutulli qanimut malinnaavigaa. Nunatsinni ukiuni marlunni kingullerni ullut tamakkiallugit tunillatsissimasut kisitsisaannik saqqummiussisoqartarnikuuvoq. Coronavirusili pillugu paasissutissanik nutaanik upernaaq saqqummiussisoqartarunnarpoq, nakorsaaneqarfik coronavirus pillugu maanna peqqinnissaqarfinnit corona-hotlinemiillu taamaallaat nalunaaruteqarfigineqartarpoq.

Aasaanera ilungersunarpallaarnavianngitsoq

Nunatsinni coronamik tunillatsissimasut omikronip allannguutaata ba.2-p tuniluunneratigut tunillatsissimasorpassuanngorput. Tuniluunneq sumiiffinnut tamanut siaruaappoq.

Omikronip allannguutaa allannguutinit allanit tuniluutianerujussuuvoq, allannguulli taanna deltatulli amerlanernut napparsimarululersitsineq ajorpoq.

Tuniluutingaatsiartoqarnerata kinguneratigut omikron allanik nutaanik allannguuteqarpoq. Danmarkimi omikronip allannguutaa ba.5 maanna tuniluuppoq, aamma nunatsinni tuniluutilereersimassaaq. Statens Serum Institutilli oqarnera naapertorlugu ba.5 allannguutinit allanit ajornerunngilaq.

Amerlasuut ukiuummat coronavirusimik napparsimaneq nalaatereerpaat, ilaallu akiuussuserneqarsimapput. Tunillatsissinnaannginnerli sivisuuneq ajorpoq, taamaammat timerput virusimut pakkersimaarinniinnarsinnaanngitsoq ukiamut naatsorsuutigisinnaavarput, Henrik L. Hansen oqarpoq.

- Tunillatsissimasut aasap ingerlanerani amerlangaatsiarnissaa ilimananngilaq. Piffissaq ungasinnerusoq isiginiassavarput, ukiamullu qanoq pisoqarsinnaaneranut piareersarluta.

- Tassungali allannguutip sorliup piffissami tassani tuniluunnerpaanera apeqqutaassaaq. Imaassinnaavoq omikronip allannguutaa ba.5 tuniluuttoq, kisianni aamma nutaanik tuniluuttoqalersinnaavoq. Allannguutilli pioreersimasut, assersuutigalugu delta aamma tuniluutileqqissinnaavoq, tamannali ilimanannginneruvoq.

Peqqinnissaqarfiup nunatsinni sumiiffinni tamani atorfiit inuttalernissaat immikkut ittumik amigaatigigai peqqinnissaqarfiup sapaatip akunnerata siuliani nalunaarutigaa. Taamaammat peqqinnissaqarfiup peqqinnissamik kiffartuussinini aasap ingerlanerani ikilisaavigisariaqarpai.

Henrik L. Hansenilli aasaanerata ingerlanerani corona peqqinnissaqarfimmut unammillernartoqartitsilissasoq naatsorsuutiginngilaa.

Akiuussusersuinermut periusissiaq

Danskit naalakkersuisuisa Danmarkimi akiuussusersuinermut periusissiaq nutaaq pingasunngornermi saqqummiuppaat, tassa 50-ileereersimasut tamarmik coronavirusimut akiuussutissamik kapiteqqissinnaanissaat neqeroorutigineqassaaq. Danskimmi naalakkersuisuisa tunillatsissimasut ukiap ukiullu ingerlanerani amerliartoqqilernissaat naatsorsuutigaat.

Nunatsinni nakorsaaqarfiup kalaallit innuttaasut akiuussusersorneqarnissaanut alloriarneq tulliuttoq aamma isiginiarpaa.

- Kikkut napparsimarululernissamut aarlerinartorsiornersut tassunga atatillugu pingaarnerpaasut isiniassavagut. Utoqqaat tunillatsinnaveersaartinnissaat qularnanngitsumik ukkatarivarput. Taakkumi napparsimarululersinnaapput.

Nunatsinni coronavirusi pillugu
killiffik

Uninngasut 0  
Toqusut 21  
Siullermik kapitissimasut 73%  
Aappassaa kapitissimasut 68%  
corona.nun.gl-imi kisitsit takukkit  
  Nutarterneqarpoq: 
  Apriilip 1-aat 14:00

corona_model_001.png

Nunatsinni coronavirusi pillugu

Coronavirusimik tunillatsinissaq pinaveersaaruk