Avatangiisit Kulturi

Students on Ice WWF-ilu inuusuttumik ilisimasassarsiornermut peqataasussarsiorput

Ilinniartut inuusuttuaqqat 100-t - taakku akornanni kalaaleq ataaseq - Issittumi ilisimasassarsiornissamut peqataanissaminnik periarfissinneqaqqipput.

Allattoq Camilla Dam

februaarip 06-at 2015 15:57

Nutserisoq Tikaajaat Kristensen

Inuusuttuaqqat 14-it 18-illu akornanni ukiullit issittumi inuunerup pinngortitallu qanoq innerani paasisaqartikkusullugit, silallu pissusaata allanngoriartornerata qanoq avatangiisinut sunniineranik paasisaqartikkusullugit Students on Ice-p ilisimasassarsiortitseqqilerput.

WWF Pinngortitaq pillugu nunarsuaq tamakkerlugu suliniaqatigiiffiup kalaallip ilinniartup ilisimasassarsiornermut juulip 27-anit aggustip qulinganut peqataasinnaanera aningaasaliiffigaa, ilisimasassarsiorneq ukioq manna Kalaallit Nunaanni, Nunavumi Canadamilu sumiiffinni assigiinngitsuni ingerlanneqassaaq.

Ilinniartut umiarsuarmi M/V Ocean Endeavourimi najugaqassapput, nunarsuarmilu ilisimatusartut assigiinngitsut, oqaluttuarisaanermik ilisimatusartut, ilinniartitsisut, eqqumiitsuliortut kulturilerisullu allat aamma ilaassapput ilisimasaminnik ingerlatitseqqillutik.

- Ilinniartitsinerup oqallinnerillu avataasigut ilisimasassarsiornermi sammisassat assigiinngitsut workshopillu peqataaffigineqarsinnaapput, ilinniartut nutaanik pilersitsinissaminnik pinngortitallu qanimut takunissaanut periarfissaqassallutik, WWF Pinngortitaq pillugu nunarsuaq tamakkerlugu suliniaqatigiiffik tusagassiutinut nalunaarummini allappoq.

Aamma atuaruk Ilinniarnertooq ilisimasassarsiorami pinngortitamut tappinnerulerpoq

Ilisimasassarsiorneq Canadami Ottawami aallartissaaq, ilinniartut imminnut ilisareqatigiinnissaannik periarfissinneqassallutik Kangerlussuarmut aallannginnerminni, Kangerlussuarmi umiarsuarmut ikissapput. Umiarsuarlu Qeqertarsuup tunuanut aallassaaq, kingornalu Sirmilik National Park Qeqertaalummut, Beechey Islandimut Qaasuitsumullu aallassapput, ilisimasassarsiornerlu Ottawami naammassineqassaaq.

Ilisimasassarsiornermut peqataaniaruit angajoqqaatit akuersiteqqaassavatit, ilinniartuussaatit 14-it 18-illu akornanni ilisimasassarsiornerup nalaani ukioqassallutit. Aammattaaq Kalaallit Nunaanni najugaqarnissat tuluttullu paasillutillu oqalussinnaanissat piumasaqaataavoq. Danmarkimi ilinniartutut, kalaaliuguit, aamma qinnuteqarsinnaavutit.

Qinnuteqarfissaq kingulleq: marsip 15-iat 2015 - uani paasissutissanik atuarsinnaavutit.