Ilinniarnertooq ilisimasassarsiorami pinngortitamut tappinnerulerpoq
Ilisimasassarsiorlutik angalasussat, Canadami Iqalunniit juulip 30-anni umiarsuarmik, Clipper Adventuremik, aallassapput. Tassanngaanniillu Nunavukkooriarlutik Kangerlussuarmi angalanertik aggustip aqqaneq-aappaanni naammassissavaat.
Ilinniartut 80-t ilisimatuullu 35-t nunanit assigiinngitsorpassuarneersut angalaqataassapput.
Kujataanilu Ilinniarnertuunngorniarfimmi ilinniartoq, Liv Oldenburg Lynge, siorna ilisimasassarsiorluni angalaqataavoq. Islandimit Nanortalik aqqusaarlugu, Canadami Kuujjuarmik angalanertik naammassivaat.
Tassani angalanermi silap pissusaata allanngoriartornerata kinguneri, ilisimatuut oqaluttuaraat.
- Nanortallip eqqaani sermeq iigartartoq takuarput, tassanilu oqaluttuaraat ukiut 40-t ingerlanerini sinaa qanoq tiffariartorsimatiginersoq. Sermillu ukiut 40-t matuma siorna ullumikkullu qanoq isikkoqqarnera qanorlu aassimatiginersoq assini takuarput, Liv Oldenburg Lynge oqaluttuarpoq.
Ilinniartut ilisimatuullu ukiumoortumik angalaqatigiittarnerat, pingaartumik misigisassarsiornermut tunngalluinnarpoq. Aammali silap pissusaata allanngoriartorneranik aallaaveqartumik avatangiisit allanngoriartornerisa uppernarsarnissaannut tunngalluinnarluni.
Aammali umiarsuaq tulakkaangat allanik misigisassaqartarpoq. Soorlu Canadami Kuujjuarmi inuit pinngitsaalillugit nutsertinneqarnerisa kinguneranik, nunaqarfik inuerunneq takusartik, Liv Oldenburg Lyngep oqaluttuaraa.
- Canadami Naalakkersuisut isumaqaramik eqqortuliornerusoq, aamma oqarlutik tuluttut oqaatsit ilinniarneqartariaqartut, inuktitullu oqaatsit eqqortuunnginnerarlugit. Nunaqarfik qimanneqarnikoq tikillugu alianaqaaq, tassami naggueqatigut angalaqatigigatsigit, taakkulu oqaluttuarput, ilaquttatik paasitinneqarsimasut, akunnerit 48-t qaangiutsinnagit nunaqarfitsik qimareertariaqaraat. Tassa inuunertik tamaat poortorlugulusooq, taamaattumik misigissutsikkut assorsuaq attortinnarlunilu aliasuummernarpoq, Liv Oldenburg Lynge oqaluttuarpoq.
Angalasut saqquummiisarput, paasiniaaqatigiittarlutik eqimattakkaarlutillu oqalliseqatigiittarlutik. Aamma inuttut pissarsianik avitseqatigiittoqartarpoq allarpassuarnillu pisoqartarluni.
Liv Oldenburg Lyngep angalaqataanera pinngortitamut avatangiisimut isiginnittariaasianut siunissamullu pilersaarutaanut allanngortitsivoq. Tassami Norgemi ilinniarnertuunngorniarfimmut qinnuteqarsimavoq, ilinniarnermi ukiunik marlunnik sivisussusilimmi, pinngortitamut avataangiisinullu tunngasunik pingaarnertut sammisaqassalluni.
- Tassani avatangiisinut tunngasunik ilinniartoqarsinnaavoq, taannalu toqqarpara ilinniarnersiutinillu pissarsillunga. Tassalu aasanerani atuanngiffeqareeruma Norgemut ilinniariartussaanga. Taamaattumik oqarsinnaavunga, siunissaq takorluugara allanngorsimavoq, Liv Oldenburg Lynge, oqarpoq.
Taamaammat tupaallannanngilaq, taassuma peqatini "Student on Ice"-mut peqataanissamut qinnuteqaqqummagit.
