Italiami politikerit EU-p coronap ajornartoortitsinerani ikiorsiissutaat pillugit aaqqiagiinngissuteqartut

Italiami politikkikkut ajornartoortoqarnissaa qanilliartorpoq. Naalakkersuisoqatigiinnimi partiit minnerit ilaat, Italia Viva, naalakkersuisoqatigiinnit anivoq. Nutaarsiassaqartitsivik Ritzau taama allappoq.

Partiip taassuma naalakkersuisoqatigiinniikkunnaarnera pissutaalluni, ministeriuneq Giuseppe Conte senatimi amerlanerussuteqarunnaarpoq.

Italia Vivap siulittaasua ministeriunerusimasoq Matteo Renzi Giuseppe Contelu piffissami kingullermi aaqqiagiinngissuteqartarsimapput. EU-p coronap ajornartoortitsinerani ikiorsiissutaasa 200 milliardit Eurot, tassa 1500 millliardit koruuningajaat qanoq atorneqassanersut taakku isumaqatigiinngissutigisimavaat.

Aningaasat immikkut ilisimasallit innersuussutaat aallaavigalugit agguataarneqarnissaat Contep pilersaarutigaa, Renzili isumaqarpoq aningaasat qanoq atorneqarnissaat inatsisartut aalajangertariaqaraat.

AAMMA ATUARUK Italiami coronavirusimik toqquteqartut 50.000-t sinneraat

Matteo Renzi partiimini pissaaneqarneruniarlunilu sunniuteqarneruniartutut isornartorsiuisunit pasineqarpoq. Italiami inatsisartunut ullumi qinersisoqaraluarpat Renzip partiia 3 procentit missaannit taaguunneqassagaluartoq, inunnik isumasiuinerit takutippaat.

Partiip naalakkersuisoqatigiinnit tunuarnissamik coronavirusip ajornartoortitsinerani aalajangernera isornartorsiuisunit aamma apeqquserneqarpoq.

Renzili akerliliivoq.

- Tamat oqartussaaqataanerat atuutsittuassanerlugu atuutsissannginnerluguluunniit aalajangigassaraarput, taanna tusagassiortunik Ruumami katersortitsinermi oqarpoq.