Italiami coronavirusimik toqquteqartut 50.000-t sinneraat

Italia nunarsuarmi nunat arfiniliatttut coronavirusimik 50.000-t sinnerlugit ataasinngormat toqusortaqalerpoq.

Tamanna USA-mi ilisimatusarfiup Johns Hopkins Universityp nalunaarsugaanni erserpoq.

Nappaammik toqquteqartut amerlasuut upernaaq toqupput, amerlasuulli septembarimili aamma nalunaarsorneqarsimallutik.

Italia coronavirusimik upernaaq marsimi eqqorneqarmat matuvoq, upernaamilu pisut assigalugit matuseqqittoqarnissaa Italiami naalakkersuisut pinngitsoortikkusuppaat, tamannami nunap aningaasarsiorneranik eqqueqimmat.

AAMMA ATUARUK Italiamiut ukiuni tallimani parnaarussassanngortitaasinnaasut

Nunap immikkoortuini maanna killilersuisoqarnialerpoq, soorlu aamma innuttaasut nuna tamakkerlugu unnuakkut aneqqusaajunnaarallartinniarneqartut.

Nunap immikkoortuisa ilaannik matusinerit iluaqutaasartut oqartussat oqaatigaat, assersuutigalugu imerniartarfiit neriniartarfiillu matuneqassallutik. Nutaarsiassaqartitsivik AFP taama allaaserisaqarpoq.

Europami nunani marlunni, tassa Tuluit Nunaanni Italiamilu, coronavirusimik toqquteqartut 50.000-t sinnerpaat.