Stoltenberg: Pingaartitagut ilungersorluta sorsuutigissavagut

Peqqarniisaarniarluni saassussisoqartarneranut inuiaqatigiit tunniutiinnarnatik pingaartitatik aallutiinassagaat, Oslop Domkirkeani sisamanngornermi eqqaaniaalluni naalagiarnermi, Norgep statsministerisimasaa Jens Stoltenberg oqalugiarnermini oqarpoq.

Ingasaasiniartup Anders Behring Breivikip inunnik 77-nik juulip 22-iani 2011-mi toqutsisimanerata ukiut qulinngortorsiornerani, statsministeriusimasoq - massakkut Natomi pisortaasoq -  inuunermi naaffeqanngitsumik  aalajangigassaqartuaannartoq oqaatigaa.

Nammineq inuttut suliffimmiluunniit aalangernissaminut nalornisinnaasarluni oqaatsigaa, tamaakkaluartorli amerlanertigut isumaqatigiissutiginninniartarluni.

AAMMA ATUARUK Ulloq Norgemiut inuiattut eqqaaniaaffiat naalakkersuisut allattoqarfiisa silataanni aallarnerneqartoq

- Pingaartitaq suunersoq ilaatigut ersarittarpoq. Qularnissamulluuniit inissaqarnani. Tunniutiinartoqassanngilarli, taanna oqarpoq.

- Peqqarniisaarniat inuartarinninnissaminnut aalajangersinnaapput, uagulli namminneq inuiaqatigiittut kiffaanngissuserput ammasuunerpullu tunngavigalugit oqartuussaaqqataanitsinnut arsaarneqassanerluta aalajangertussaavarput.

- Ukiut qulit qaangiupput uumissuineq asanninnermik taarseratsigu. Sulili uumissuisoqarpoq. Soorlu taamaaliortoqartoq Benjamin Hermansenip eqqaassutissaa serlersaarfigineqarmat, statsministeriusimasoq oqalugiaammini oqarpoq.