Ulloq Norgemiut inuiattut eqqaaniaaffiat naalakkersuisut allattoqarfiisa silataanni aallarnerneqartoq

Ukiut qulit matuma siornatigut Norgemi amiilaarnartumik inuppassuarnik toqoraaneq ullumikkut sisamanngornermi ukiut qulinngortorsiorlugit Utøyami Norgemilu illoqarfiit pingaarnersaanni Oslomi eqqaaniaasoqarpoq.

Oqalugiartoq siulleq tassaavoq Kristine Røyneland, taassuma pania Utøyami toqutanut ilaavoq.

- Soqqusaalluinnartumik naapertuilluanngitsumillu toqoraaneq pillugu taamanikkut toqutaasut ullumikkut qanormita oqarsimassagaluarpat? Pakatsisimassagaluarput inuiaqatigiinni oqalliseriaaseq kukkulluinnartoq pakatsissutigisimassagaluaqaat. Aammali tulluusimaassagaluarput, toqoraanerup kingorna uagut qanoq qisuariarnerput tulluusimaarutigissagaluarpaat, aammalu eqqartuussiviup nukittuumik pinera aamma tulluusimaarutigisimassagaluarpaat, taama anaanaasoq oqaluttarfimmi ilaatigut taama oqarpoq.

AAMMA ATUARUK Utøyami 2011-mi saassussineq eqqaaniarneqartoq

Norskit ministeriunerat Erna Solberg oqalugiartunut ilaavoq.

Solberg oqalugiummini nalornisoorneq, maqaasineq aammalu kamanneq pillugu eqqartuivoq. Ilaatigut ernummatiginerarlugu Utøyami annattortaasa malersugaasimanerat qunusaarneqarsimanerallu.

- Tamatuma ersersippaa, qanoq pingaartigisoq uumissuinerup ammillu qalipaataa tunngavigalugu immikkoortitsinerup aammalu ingasaassiniarnerup akiorniartuarnissaat. Uumissuineq akerlilerneqarsinnaanngitsutut isigissanngilarput, taanna oqarpoq.

Inuit 77-t qunutitsilluni toqoraanermi toqutaapput. Toqoraasoq Anders Breivik toqoraareernerup kingorna ukioq ataaseq qaangiummat ukiuni 21-ni parnaarussassanngortinneqarpoq.