Steen Lynge suli eqqarsarpoq
- Suli aalajanginngilanga, Steen Lynge ullumi oqarpoq, naak siulittaasussarsiornissaq ataatsimeersuarnermi aqagu ullaatungaa nalunaaqutaq qulingiluanut pisussaagaluartoq.
Sisamanngormat ulloq qinersivimmi Atassutip Nuummi immikkoortortaata ilisimatitsissutigaa, Steen Lyngep partiimi ajutoornermik eqqugaaqqaqisumi siulittaasunngornissaa innersuussutigigitsik.
Maanna siulittaasoq, Gerhardt Petersen, ilisimatitsereerpoq siulittaasutut qinigassanngorteqqinniarluni, Steen Lyngellu innersuunneqarnini akuerissappagu tassa unammisussaassapput.
Steen Lyngep eqqarsarnerminut pissutaanerarpaa, siulittaasunngussagaluaruni tamanna ilaqutariinnut qanoq sunniuteqassanersoq.
- Atassummut akisussaaffilerujussuartut misigisimavunga, siulittaasuussagaannili piffissarujussuaq atortariaqarpoq, mikisunillu meeraqarpunga, Steen Lynge oqarpoq.
- Partiimi qanoq pimoorussisoqartiginersoq maanna maluginiarniarpara. Suleqatigiittussaavugummi. Siulittaasoq kisimi suliaqarsinnaanngilaq, aamma oqarpoq.
Folketingimut sisamanngormat qinersinermi Atassut 1.728-nit qinerneqarpoq, Steen Lyngep 870-it taakkunannga pissarsiaralugit. 2007-imi qinersinermi Atassut 4.097-init qinerneqarpoq.
