Steen Lynge: Meeqqat politikkimit pingaarnerupput
Politikki pimoorulluaraanni angusarissaarluarnissamut aqqutaalluarsinnaavoq, Steen Lyngemulli 47-nik ukiulimmut, niviarsiaqqamut nukappiaqqamullu tallimanik ukiulimmut ataataasumut allaanerusumik isikkoqarsinnaavoq. Nammineq oqarneratut partiimut nutarsaaqataanissaq soqutiginarnerpaavoq, aammali allamik eqqarsaatigisassaqarpoq.
- Tusagassiortoq sianerpoq erneralu tallimanik ukiulik arsaattugut, ernerma kiinaa piffissaqarfigineqalersimasoq tipaatsuttoq, nuannaartorlu isigalugu aalajangerpunga piffisaanngitsoq siulittaasutut sulilernissamut. Ullumikkut meeqqama nuannaraat pinnguaqatigissallunga, ukiulli ikittut qaangiuppata pikkunaagilissavaat, taamaattumik maanna piffissaavoq ilaginissaat, Steen Lynge oqarpoq.
Steen Lynge Atassut tunuliaqutaralugu ippassaani Folketingemut qinersisoqarmat qinigassanngortippoq, 870-nillu taaneqarnermigut paartiimi qinigassanngorteqatiminit sisamaasunit qinerneqarnerpaajulluni. Qinersinerup unnukkuani Steen Lynge KNR.gl-imut oqaraluarpoq Folketingemut imminerminut qinersisut toqqammavigalugit aalajangerumaarluni Atassummi siulittaasutut qinigassanngortissanerluni. Uanili Atassut pingaarnerunngitsoq, ilaquttalli pingaarnerusut Steen Lyngep oqaatigaa.
