Steen Lynge: Isumaginninnermi oqartussaasut nukittorsaavigineqarlik
Taamaammat isumaginninnermi oqartussaasuni sulisut pitsaanerusunik atugaqalernissaat Atassutip ilungersuutiginiarpaa. Ulluinnarni suliassarpassuit pissutigalugit tamaviaartitaasut amerlavallaaqaat, tamannami pissutigalugu sullinneqartut ajornerusumik sullinneqartarput.
-Isumaginninnermi siunnersortip ataatsip suliarpassuaqarneratigut isumaginninnikkut ajornartorsiuteqartorpassuit oqartussaasunut saaffiginnissutimik suliarineqarnissaat sivisuallaartumik utaqqisariaqartarpaat. Ikiorneqarnissamullu sivisuallaartumik utaqqisitaasarnerup kingunerisaanik meerarpassuit asuli naalliuttariaqartarput. Tamanna akuerineqarsinnaanngilaq, Steen Lynge naqissusiivoq.
Nuummi sullissisup ullumikkut suliat 100 missaat suliassarisarpai. Danmarkimi piumasaqataavoq sulisup ataatsip amerlanerpaamik suliat 35-ikkuutaarlugit suliarisassagai. Taamaammat maani nunatsinni isumaginninnikkut suliarpassuit assersuutigalugu ilaqutariinni meerartalinni ajutoortoqannginnerani piffissaagallartillugu suliarineqartannginnerat takusarparput.
- Isumaginninnermi oqartussaasut tassaapput sulianik tamanik nalilersueqqaarfiusartut innuttaasunillu ajornartorsiortunik oqaloqatiginniffiusartut, tamatumalu kingorna assigiinngitsutigut suliassanngortillugit ingerlateqqinneqartarfiat. Taamaammat Atassut isumaqarpoq isumaginninnermi oqartussaasut nukittorsarneqartariaqartut, pingaartumik ilaqutariit meerartallit sukkasuumik ikiorneqarsinnaanngortillugit. Suliap aallartinnerani, ikiortariaqartoqarnersoq paasiniarneqartarpoq, taamaammat pingaaruteqarpoq sukkasuumik suliatigullu illersorneqarsinnaasumik sullissisoqarnissaa, Steen Lynge nassuiaavoq.