Oqallittut Hans Egedemut eqqaassutissap toqqavia aalaqqajutsikkaat
Hans Egedemut eqqaassutissaq Nuup ilaani qaqqajunnap qaaniittoq erinarsortartup Julie Berthelsenip maluginiartorsuusarsimanngikkaluarpaa. Taanna Nuummi peroriartorpoq, eqqaassutissarlu tassaniittuaannarsimammat eqqarsaatersuutigisarsimanagu.
Eqqaassutissarli pillugu oqallittunut malinnaareerluni isumaa nammineq aamma erserpoq, taamaammat inuit nittartakkatigut naapittarfianni saqqummerpoq.
- Oqaluttuarisaanerup peerneqarnissaa puiorneqarnissaaluunniit pineqanngimmat erseqqissaatingerusuppara, puiuinnarneqarsinnaanngilarmi. nutaamilliuna oqaluttualionissamut tunngasoq, taanna oqarpoq.
- Facebookimut ikkutanni soorlu eqqaaginga, peerneqarnissaa pisariaqartinneqarpat sooq tapersersuinnarneqarsinnaanngila, Julie Berthelsen oqarpoq.
Oqallinneq misigissuserpassuarnik qaffaakaatitsisoq
Hans Egedemut eqqaassutissap qalipaammik "decolonize"-mik oqaasertalerlugu aappaluttumik inuiattut ullorsiornitsissatsinnut unnuaani kuerarneqarmalli oqallitoqalerpoq.
Oqallinnermi misigissutsit assigiinngitsut aallavigineqarnera Julie Berthelsenip paasilluarsinnaavaa.
- Kinaassutsitsinnik tamakkiisumik atueqqusaannginnitsinnut piffissamut eqqaassutissaavoq. Nunasiaataanerup naqisimaneqarnerullu nalaani pisunut takussutissaammat misigissuserpassuarnik qaffakaatitsisoqarnera paasisinnaavara. "Kukkuvusi, imaassaasi", Julie Berthelsen oqarpoq.
AAMMA ATUARUK Katersugaasiviup pisortaa eqqaasutissaq pillugu: Suut tamarmik nuunneqarsinnaapput
Eqqaassutissaq qanga pissutsinut takussutissaammat peeqquneqarnera paasisinnaalluarnerarpaa, kisiannili:
- Aserorneqarnissaa, aatsillugu imassaliarineqarnissaa, ikuallanneqarnissaa immamulluunniit inginneqarnissaa pisariaqanngitsoq isumaqarpunga. Peerneqassappat katersugaasivimmut nuunneqarnissaa pitsaanerusoq, oqaluttuarisaanermummi tunngasut tassaniittarput. Oqaluttuarisaanermi allanngortinneqarsinnaanngilaq, takusarneqarsinnaasumiikkuni paasisaqarfigineqarsinnaasumiissasoq isumaqarpunga, Julie Berthelsen oqarpoq.
Atsiornernik katersisoqartoq
Hans Egedemut eqqaassutissaq pillugu isummat assigiinngitsorpassuupput. Peter Stefani Peqatigiiffik Nuummit Eqqaamasaneersup Hans Egedemut eqqaassutissaq ataannaqqullugu atsiornernik katersivoq.
- Ajoqutaanngilaq, uagutsinnut tanngassimaarutaavoq. Uagununa siulitsinnut eqqaassutissarput, siulittaana uagut nappagaat, ilaquttatta uagut ilaquttatta nappagaat ilaqutartik pillugu, Peter Stefani Qanoruumut oqarpoq, nangipporlu:
- Taamaassappat nunatta oqaluttuarisaanera tamaat peerluaannaraanni assigaa. Tassami taamatut oqarninnut peqqutigaara taamanikkut pissutsit taamaapput, oqaatsit isumai taamanikkut allaapput.
- Taavalu aamma sumut iluaqutaassagami tamakku ajortumik pineqarnertut taaneqartut massakkut oqartarnerattut natersuup ataanut saneraluarutsigit? Ataatsimilluunniit angusassaqanngilagut.
AAMMA ATUARUK Angut eqqaassutissamut serlersaarinermut atatillugu pasineqartoq
Eqqaassutissap peerneqarnissaa filmiliortartup Aka Hansenip taperserpaa:
- Nunasiaataanerup eqqaassutissaatut uanga isumaqartippara.
- Takussutissiaq ullutsinni kinaassutitsinnut naqisimannikkami. Ullutsinnimi suli nunasiaataavugut, taamaattumik tassunga takussutissiatut ulluinnarni takusassallugu tulluarsorinnginnakku, Aka Hansen oqarpoq, eqqaassutissallu peerneqarnissaa namminersulivinnissamut aqqummut ilaasutut isigigini oqarluni.
Hans Egedemut eqqaassutissaq qanoq pineqassanersoq innuttaasut aalajangeeqataaffigissagaat Kommuneqarfik Sermersuup borgmesteriata Charlotte Ludvigsenip siusinnerusukkut oqaatigaa.