Katersugaasiviup pisortaa eqqaasutissaq pillugu: Suut tamarmik nuunneqarsinnaapput
Eqqaassutissaq qaqqap qaani inissisimasussatut pilersinneqanngilaq. Hans Egedemut eqqaassutissaq Nuummiittoq oqaluffimmiittussanngorlugu aallaqqaammut sananeqarpoq. Oqaluffimmiipporlu.
Danskinit norgemiunillu kingoqqisup eqqaassutissaa Nuummiittoq aallaqqaasiutigalugu sanaajunngilaq, sananeqaqqaarnera Københavnimi Marmorkirkemiippoq.
Nuummi eqqumiitsulianik katersugaasiviup pisortaa, Nivi Christensen nassuiaavoq. Taassuma Hans Egedemut eqqaassutissap siunissaa piffissami kingullermi oqallisigineqartoq malinnaaffigaa.
AAMMA ATUARUK Folketingimi ilaasortap nunatsinneersup Hans Egedemut eqqaassutissaq peerusukkaa
Eqqaassutissaq ullumikkut sumiiffigisaminiiginnassava, Folketingimut ilaasortap, Aki-Matilda Høegh-Damip Siumumeersup siunnersuuteqarneratulli katersugaasivimmiissava, imaluunniit sumiiffimmut allarluinnarmut nuutsinneqassava?
- Eqqaassutissaq tunngaviusumik katersugaasivimmiittussaasorinngilara. Isumaqarpunga silamiittussaavoq, nuunnissaali isumatsialaasoraara, Nivi Christensen oqarpoq.
Inissisimanera arlaatigut isumaqartoq
Nunatta Katersugaasivia Atuagaateqarfiatalu pisortaata, Daniel Thorleifsenip Hans Egedemut eqqaassutissiaq qaqqap qaaniitsinnagu assersuutigalugu Hans Egedep Illuata sanianut Hans Egedelluunniit oqaluffiata eqqaanut inissinneqarsinnaasoq, Sermitsiaq.ag-mut oqaatigaa.
Nivi Christensenip tamanna takorloorsinnaavaa.
- Qaffasissumiilluni ammut isiginera isumaqarpoq, taanna oqarpoq, nangillunilu:
- Suut tamarmik nuunneqarsinnaapput. Taamaammat nuunneqaraluaruni ajoqutaanavianngilaq, aamma nuunneqarnera uggorineqarluni piffissami allani allamut nuutsinneqaruni. Sumi inissisimanera apeqqutaalluni assigiinngitsunik isumaqarpoq, tamannalu ajunngilaq.
Hans Egedep eqqaassutissaa inuiattut ullorsiornerup unnuaani aappaluttumik qalipanneqarpoq ”decolonize”-millu allagartalerneqarluni.
Kommuneqarfik Sermersuup borgmesteriata, Charlotte Ludvigsenip innuttaasut piaartumik akulerutinneqassasut nalunaarutigaa, tamanna eqqaassutissaq peerneqassanersoq peerneqassannginnersorluunniit pillugu oqallittoqarnerata nalaani pivoq.
AAMMA ATUARUK Borgmesteri: Innuttaasut Hans Egedep eqqaassutissaata siunissaa aalajangissavaat
Katersugaasiviup pisortaata, Nivi Christensen oqarnera naapertorlugu Hans Egedep eqqaassutissaa pillugu oqallinneq nalinginnaalluinnartuuvoq, malissuullu ilaralugu.
- Uagut kisitta paasiuminaatsumik, avissaartuutsitsisumillu inuit nuannarisaanik nuannarinngisaannillu oqaluttuarisaaneqanngilagut, taanna oqarpoq.
USA-mi Tuluit Nunaannilu eqqaassutissat assersuutigalugu inussiaarniartartut, inussiaatillit eqqaassutissalluunniit assingusut tamat sumiiffigisaanniittut akerliussutsimik takutitsisunit uppisinneqarput oqartussaniilluunniit peerneqarlutik.
Tamanna naggueqatigiinnik assigiinngitsunik assigiinngitsisinermut politiillu nakuusertarnerannut akerliussutsimik takutitsinermut atatillugu pivoq. Akerliussutsimik takutitsinerit Georg Floydip Minneapolisimi maajip qaammataani tigusarineqarnermini toquneranit aallarnerneqarput.
