Nuummi innuttasut Hans Egedep Nuummi eqqaassutissaata siunissaanut aalajangeeqataassasut, borgmesteri nalunaaruteqarpoq. Toqqorsivimmit assi.Assi: Kommuneqarfik Sermersooq

Borgmesteri: Innuttaasut Hans Egedep eqqaassutissaata siunissaa aalajangissavaat

Innuttaasunik peqataatitsinikkut Hans Egedep Nuummi eqqaassutissaa suneqassanersoq aalajangerneqassaaq.

Innuttaasut Hans Egedemut eqqaassutissap suneqarnissaanut piaartumut peqataatinneqassapput.

Kommuneqarfik Sermersuumi borgmesteri, Charlotte Ludvigsen, taama oqarpoq.

Danskinit norgemiuniillu kingoqqisup, Hans Egedep eqqaassutissaa inuiattut ullorsiornitsinni ”decolonize”-imik (nunasiaajunnaarsitsineq aaqq.) allagartalerlugu qalipanneqarmalli eqqaassutissap siunissaa pillugu oqallittoqalerpoq.

- Eqqaassutissaq pillugu oqallinneq pingaaruteqarpoq, misigissutsillu sakkortuut illuatungeriinnit saqqummerput. Pisumi matumani eqqaassutissap siunissaa pillugu innuttaasut oqalliseqatigilluarnissaat pingaaruteqarsoraara.

- Aalajangiinerput nunatsinni kinguaariinnut sunniuteqartussaavoq, Charlotte Ludvigsen tusagassiuutinut nalunaarummi oqarpoq.

Kommunip akisussaaffigigaa

Kommuneqarfik Sermersuup borgmesteriata innuttaasut kissaataat malillugu aalajangiinissaq pingaaruteqarsoraa.

- Hans Egedep isornartorsiorneqarnerata ilarujussuani kristumiuussuseq kitaamiusullu inooriaaseq kalaallit qulangerlugit atugassanngortissimagai isornartorsiuuutigineqarpoq. Taamaammat eqqaassitissaq qanoq iliuuseqarfiginiarneqarneranut innuttaasut peqataatinneqanngippata tamanna mitallikujunnerussaaq. 

- Aalajangiinnginnermimi innuttaasunik peqataatitsinissaq inuiaqatigiittut eqqaassutissap ukiut 98-it matuma siorna napparneqarneranit pitsanngoriarsimanitsinnut takussutissiissaq, Charlotte Ludvigsen oqarpoq.

AAMMA ATUARUK Folketingimi ilaasortap nunatsinneersup Hans Egedemut eqqaassutissaq peerusukkaa

Eqqaassutissaq nammineq katersiniarnerup inernerisaanik 1922-mi napparneqarpoq. Atoqqaartitsisoqarneranilu illoqarfiup innuttaasuinut tunniunneqarluni. Eqqaassutissamut akisussaaffik 1953 tikillugu KGH-miissimavoq, tamatumalu kingorna Nuup Kommunianut tunniunneqarluni.

Innuttaasunik ataatsimiititsisoqassasoq

Borgmesterip eqqaassutissamut atatillugu misigissutsit akuleriiaartut paasisinnaavaa.

- Inuit eqqaassutissamut atatillugu assigiinngitsunik misigissuseqartut paasisinnaavara. Nunasiaataanerup nalaani naapertuilluanngitsuliornerpassuarnik pisoqarsimavoq, nunasiaataanermilu pisimasut isumassaqartinngilakka.

- Illuatungaanili oqaluttuarisaanitsinnut ilaallunilu inuiaqatigiinnut ullumikkumut ilusilersueqataavoq, borgmesteri itisiliivoq.

AAMMA ATUARUK Hans Egedep eqqaassutissaa serlersaarfigineqarsimasoq

Innuttaasunit peqataatitsineq innuttaasunik ataatsimiititsinikkut kommunillu internettikkut innuttaasunut peqataatitsisarfiatigut ingerlanneqassaaq. Allagaqarluni akissuteqarnissaq aamma periarfissaagumaarpoq.

Suliaq taanna piaartumik aallartisarneqassaaq, qaammatinillu marlunnik sivisussuseqassangatinneqarluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat