Statsministeri aatsitassat pillugit isumasioqatigineqassaaq
Sara Olsvig illersornissamut ministerip Nick Hækkerupip SAR pillugu akissutissaanik sivisuumik utaqqisimavoq, taamatuttaarlu naalakkersuisunut illuatungiliuttut Venstre sukumiisumik nassuiaasoqarnissaanut utaqqipput. Illersornissamut ataatsimiititaliaq aasaq nunatsinni paasisassarsiortoq nunatsinni siunissami upalungaarsimanissaq pillugu eqqartuivoq. Taakkuli ministerinit suliamut attuumassuteqartunit sukumiisumik paasissutissinneqarsinnaasimanngillat. Upalungaarsimaneq SAR angallannermut, illersornissamut inatsisinillu atortitsinermut ministeriaqarfinnit suliarineqarpoq, tamannalu pissutaalluni tamakkiisumik paasissutissiisoqarsinnaasimanngilaq.
- Ullumikkut isumasioqatigiinnermi ilisimatinneqarpugut upalungaarsimanermut SAR-imut tunngasut inissilersut. Isumaqatigiissut, KNR-mi eqqartorneqareersutut, pitsaanerpaajunngilaq tassungalu paarlattaasinnaasoq pitsaanerunngilaq. Ministeri apeqquterpassuarnik saqqummiussiffigineqaraluarpoq, taakkuli ilarparujussuit ministerinut allanut innersuuppai, Troels Lund Poulsen KNR.gl-mut oqarpoq.
Apeqqutigineqartut ilagaat aatsitassarsiornermi suliassat annertuut Kalaallit Nunaanni akuerineqassappata tamanna qanoq sunniuteqassanersoq. Apeqqummili tassani ministeriaqarfiit arlallit akisussaaqataapput, tamannalu pissutigalugu aalajangiunneqarpoq statsminister Helle Thorning Schmidt suliaq pillugu isumasioqatigineqassasoq.
- Apeqqutigineqartut ilarpassuit Nick Hækkerup akisinnaanngilai tamannalu paasisinnaalluarparput. Kisianni apeqqutit akineqanngitsut akineqarnissaat anguniarlugu allatut ajornartumik statsministeri isumasioqatigisariaqarparput. Kalaallit Nunaanni aatsitassarsiorneq annertusissagaluarpat iliuusissat pillugit suli apeqquterpassuaqarpoq. Assersuutigisinnaavarput Kinamiorpassuit tikerarnissaat, upalungaarsimaneq aammalu umiarsuarujussuit Nuup Kangerluatigut ingerlaartalernissaat allarpassuillu. Tassa isumasioqatigiinnissaq sioqqullugu statsministerip atorfilittai misissugassarpassuaqarput, Troels Lund Poulsen oqarpoq.
