Qaanaaq: Meeqqat atuartut sprittimik pillerfigineqartarsimasut

Qaanaami inuit ilaasa sprittimik aanngajaaruteqalersimanerat ernumanartillugu, innuttaasut ilaat marlunngormat ataatsimiipput. Qulit takkupput, siunissamullu ernummatitik oqaloqatigiissutigalugit.

Arrutaq Kujaukitsoq isiginnaaginnarsinnaajunaarami nunaqqatiminik aggersaavoq.

- Ernumanartua uaniinnerpaavoq, meeqqat atuarfianni atuartut allaat sprittimik pillerfigineqartalersimagamik sprittitortuninngaanniit, Arrutaq Kujaukitsoq oqarpoq.

Marlungornermi ataatsimiinneq tigussaasumik aalajangiiffiunngitsoq taanna oqarpoq. Ataatsimiinnerli aallaqqaammut oqaasertalersuiffiuvoq.

- Innuttaaqatigut peqqinnanngitsumik taamaattumik sprittimik imigaqartut, isigillutigillu qisuariarfigineqassanatillu annerusumik pimmata uagut nunaqqatigiit killiffitsinni eqqartueqqatigiippugut, Arrutaq Kujaukitsoq oqarpoq.

AAMMA ATUARUK Qaanaami spritip aalakoorniutitut atornerlunneqartarnera unitseqquneqartoq

Marsip ingerlanerani naapeqqissapput, tassanilu amerlaneriunissartik siunertarissaarutigaat iliuusissanillu ujartuinissartik siunniullugu.

- Immitsinnut nalunngitsorujussuugatta, nalunngisarput sprittisiniartoq takugutsigu oqaasissagut toqqusaatsinnut unittarmata oqaaseqanngiinnartarlutalu, Arrutaq Kujaukitsoq oqarpoq.

Avannaata Kommuniani Ilaqutareeqarnermut Ataatsimiititaliami siulittaasup, Jens Immanuelsenip, innuttasut ernummatitik pillugit iliuuseqarniarmata nuannaarpoq, Meeqqat Illersuisuatalu Qaanaamiissimanermini nalunaarusiaata imarisa pillugit ataatsimiititaliap kommunalbestyrelsemut upernaaru saqqummiussiniarnera KNR-imut eqqaasitsissutigalugu.

AAMMA ATUARUK Qaanaarmiut sprittimik tuniniaaneq unitsikkusukkaat