Kommune nutaaq Avannaani Isertitsissutaasinnaasunik siunnersuutit amigaataapput
Avannaani kommuni kujallinngortussaq kommunit avinneqarpata aningaasatigut unammilligassaqarpoq.
Nalunaarusiami siunnersuisoqatigiiffiup BDO-p suliarisimasaani, avannaani kommune kujallinngortussap aningaasartuutai isertitanit amerlanerussapput taamaattumillu allaffissornikkut atugassaaarnikullu sipaaruteqartoqartariaqassaaq imaluunniit
akileraarut qaffanneqartariaqassaaq kommunip aningaasatigut oqimaaqatigiissumik inissisimassappat.
Ane Hansen Inuit Ataqatigiit aamma Jess Svane Siumut ikaarsaariarnermut ataatsimiititaliamut qinigassanngortipput qinigaagunillu avannaani kommune kujalliup kommunalbestyrelseani ilaasortanngussapput.
Taakkua marluullutik Qanoruuumi oqarput, kommuninngortussamut tamanna unammillernartussasoq, taamaattorli Ane Hansenip Jess Svanillu toqqaannartumik akissuteqanngillat, aningasarsiornikkut unammalligassaq qanoq isumaqarfiginerlugu.
Taamaattorli Ane Hansen oqarpoq amigartooruutigineqartussap akileraarutip qaffanneqarneqarneratigut aaqqiissoqassanngitsoq
- Ukiup siulliup ingerlanerani akileraarutip qaffanneqarnissaa naatsorsuutiginngilarput, Ane Hansen oqarpoq.
- Suliffeqarfinnit anginerusunit kommunip pilersitsiffigineqarnissaanut pilerinartuunissaa IA-mit sulissutigineqassaaq, taamaalilluni akileraarutitigut isertitsissutaasinnaasut pitsaanerpaat anguneqassammat, Ane Hansen oqarpoq.
Kommuni nutaaq kujasinnerusumiittoq qullersaqarfimmi Qaasuitsup Kommuniasulli amerlartigisunik sulisoqassasoq, nalunaarusiami aallaavigineqarmat, Jess Svanep eqqaasitsissutigaaa.
Namminerli isumaqarpoq, kommunimi nutaami taama amerlatigisunik siuttuusunik sulisoqartariaqaratik.
Tamannalu sipaarutaassasoq oqarpoq:
-Uanga takunnissinnaanera naapertorlugu, kommuninngortussap nammineerluni aalajangersortussaavaa,
Qaasuitsoq Kommuniusup massakkut direktøreqartitaasa amerlaqataanik, kommuninngortussaq direktørinik atorfinitsitsissanerluni aamma pisortat tulliinik taama amerlatigisunik atorfinititsissanerluni, Jess Svane oqarpoq,
- BDO-p nalunaarusiaani nalilersuineq sakkussatsitut atussavarput, Svane oqarpoq, - kisianni uanga ilimaginngilara pisortaqatigiiaarpassuit asseqqissaavinik kommune nutaaq atorfinitsitsissasoq, Jess Svane Qanoruumi sisamanngornermi aallakaatineqartumi taama oqarpoq.