Spaniap ministeriunerata suliani unitsikkallarlugit eqqarsarfissaqarnissani siunniukkaa
Spaniami ministeriunerup Pedro Sanchézip nuliami peqquserluttuliorsimasutut pasineqarluni oqartussanit misissuivigineqaleruttornerani ministeriunertut tunuarniuteqarnissani eqqarsaatersuutigaa.
Sanchéz inoqatinut attaveqaqatigiittarfikkut X-ikkut pingasunngornermi taama allaaserisaqarpoq.
Suliani unitsikkallarlugit eqqarsarfissaqarnissani siunniullugu ministeriunerup oqaatigaa.
- Sulinissaq imminut akilersinnaassanersoq apeqquserusuppara, sulinissaq imminut akilersinnaanersoq paaserusuppara, naalakkersuisuni siuttuunissara eqqarsaatersuutigisariaqarpara, Pedro Sanchéz X-ikkut allappoq.
Qanoq aalajangersimanerluni tusagassiorfinnut ataasinngorpat nalunaarutiginiarlugu oqaatigaa.
Pedro Sanchézip nuliata Begona Gomezip peqquserluttuliorsimaneranik Spaniami politiit pasilliuteqalersullu ministeriuneq taama nalunaaruteqarpoq.
Politiit suliami misissuisitsilersimapput.
Begona Gomezip suliffeqarfinnut namminersortunut attaveqaatai Spaniami oqartussat sinnerlugit misissuisartut misissuileruttortut Spaniami nutaarsiassaqartitsiviup El Confidencialip allaaseraa.
Suliffeqarfiit pineqartut Spaniami oqartussanit kiffartuussinissamik isumaqatigiissusiorfigineqarsimapput, Gomezillu taakkununnga attaveqaatai misissorneqaleruttorlutik.
