Inatsisartut Lagtingilu sorsunnissamik aalajangernermut tusagaqarsimanngillat
- Danskit passii passeraagut. Naalagaaffiup ataaniippugut. Taamaammallu uani aalajangerneq, aammalu taamatut sorsunnermut peqataanissamut aalajangerneq, uatsinnut sunniuteqartussaavoq, Nunanut allanut sillimaniarnermullu ataatsimiititaliami siuliittaasup tullia, Inuit Ataqatigiillu siulittaasuat Sara Olsvig taama oqarpoq.
Taamaammallu Nunanut allanut sillimaniarnermullu ataatsimiititaliami ilaasortat ilisimatinneqarnissaat pingaaruteqartoq, Sara Olsvig isumaqarpoq.
Taamaattoqarsimanngilarli.
- Nunanut allanut sillimaniarnermullu ataatsimiititaliami ilisimatinneqanngilagut. Naluara, Naalakkersuisut tamanna pillugu ilisimatinneqarsimassanersut, imaluunniit aalajangeeqataatinneqarsimassanersut, Sara Olsvig KNR-imut oqarpoq.
Aamma atuaruk Danmark sakkutuunik Syrialiartitsilersoq
Skaale: Isumaqatigiissut unioqqutinneqarpoq
Sakkutuunik Syriamukartitsinissamut Folketingip nunanut allanut ataatsimiititaliaani ullumi aalajangertoqarmat Savalimmiut folketingimut ilaasortaatitaat Sjurdur Skaale peqataavoq.
Syriamullu sakkutuunik Islamisk Statimut akiuuttussanik aallartitsinissaq taassuma tapersersorpaa.
Taamaattoq Savalimmiormiut aalajangernermi aamma ilaatinneqarsimanngillat.
Tamannalu Sjurdur Skaalep aamma iluarinngilaa, Savalimmiullu nunanut allanut tunngasut pillugit ilaatinneqartarnissaa, Danmarkip Savalimmiullu 2005-imi isumaqatigiissutaat innersuussutigalugu.
- Sakkutuut Danmarkimit aningaasalersorneqaraluarput. Kisianni naalagaaffik sorsuttunut ilannguppat, taava Kalaallit Nunaat Savalimmiullu sorsoqataalissapput. Taamatulli aalajangernermut ilaatinneqanngilagut, Sjurdur Skaale KNR-imut oqarpoq.