Soraarnerusutisiassanut aaqqissuussineq: Vittus Qujaukitsoq isumasioqatiginiarneqartoq
Innuttaasut 6.828-t soraarnerusutisiaqarnissamut aaqqissuussinermut peqataasussaatitaanermut akiliisarsimanngillat. Taamammat Akileraartarnermut Aqutsisoqarfik aningaasanik amigaataasunik akiliisitsiniarpoq.
Tassa imaappoq innuttaasut 6.628-t inatsit malillugu soraarnerusutisiassanut nammineq katersisussaatitaanermut akiliiniagassammata taakku ukioq manna akileraaruteqarnerusariaqarput.
Innuttaasut qanoq aningaasarsiaqartiginerat apeqqutaalluni 2 procentip 6 procentillu akornanni akileraarnerutinneqassapput.
Soraarnerusutisiassat pillugit suliat illuatungiliuuttut naammagilerpaat, taamaammat aningaasaqarnermut naalakkersuisoq, Vittus Qujaukitsoq isumasioqatigiinnissamut aggersarpaat.
- Soraarnerussutisiaqalernissamut aaqqissuussinermut peqataasussaatitaanermi akileraartarnikkut suliaq tukanneruleraluttuinnartutut isikkoqariartormat, partiit illuatungiliuttut ataatsimoorlutik Naalakkersuisut ammasumik siunnersuinissamut aggersarpaat, illuatungiliuttut tusagassiuutinut nalunaarummi allapput.
AAMMA ATUARUK Peqatigiiffiit: Soraarnerusutisiassanut ajornartorsiutaasoq arlaatigut iliuuseqarfigineqassaaq
Inuit Ataqatigiit, Partii Naleraq, Atassut aamma Suleqatigiissitsisut Naalakkersuisut inatsisit malissimaneraat paaserusuppaat:
- Illuatungiliuttut tamattaalluta partiit allat kissaatitsinnut tapersiinissaat neriuutigaarput, taamaalilluta innutaasut pisinnaatitaaffii qulakkeersinnaassagatsigit, suliamilu kukkussutaasinnaasut inatsimmilluunniit pitsanngoriaataasinnaasut sapinngisamik piaarnerpaamik isumagineqarnissaat qulakkeerneqarsinnaaqqullugu, illuatungiliuttut allapput.
Soraarnerusutisiassanut pinngitsoorani katersisussaatitaaneq siorna atuutilersoq
Inuit 6.000-init amerlanerulaartut soraarnerussutisiassaminnut naammattumik akiliisimanngitsut suliffitik aqqutigalugit soraarnerussutisiaqarnermut isumaqatigiissuteqanngitsuugajuttuusut, Akileraartarnermut Aqutsisoqarfiup pisortaata tullia, Sivert Larsen KNR-imut sapaatip akunnerani matumani siusinnerusumi nassuiaavoq. Taakkuali inuussutissarsiutaat suliffiallu assigiinngitsorujussuupput.
- Innuttaasut aalajangersimasut immikkut taamatut nalunaarsunngikkaluarlugit, kisianni takusinnaasagut malillugit kikkut tamarmik, aalisartuugunik imaluunniit allanik atorfeqarunik, pisussaaffimminnik naammassinninngitsoortarsimapput. Aalajangersimavinngilaq, Siverth Larsen oqarpoq.
Soraarnerusutisiaqalernissamut aaqqissuussamut peqataasussaatitaaneq januaarip aallaqqaataat, 2018-imi atuutilerpoq, Namminersorlutik Oqartussalli Akileraartarnermut Aqutsisoqarfillu akileraarutip procentiata qaffanneratigut soraarnerussutisiassanut aatsaat ukioq manna akiliisitsipput.
Isumasioqatigiittoqarnissaanut ulluliisoqanngilaq. Illuatungiliuttullu partiiata Siumumit Aningaasaqarnermullu Naalakkersuisumit aggersaanermut akissuteqartoqarnissaa maanna utaqqivaat.