- Ajornartorsiutaareersut ajornersulerteqqissanngikkivut isumaqarpunga, soraarnerussutisiaqarnissamut pinngitsoorani aaqqissuussinermut tunngassuteqartumik ammasumik siunersiuinermi, Vittus Qujaukitsoq ilaatigut taama oqarpoq.Assi: KNR

Soraarnerussutissanut katersineq pillugu ammasumik siunersiuineq: Kusanaatsuliaq! Naamik ajunaarnersuaq!

- Ajornartorsiutit piunerannit anginerusunngortittariaqanngilagut, aningasaqarnermut naalakkersuisoq, ammasumik ataasinngornermi ualikkut siunersiunermi, nunatsinni siullerpaasumi, oqarpoq.

Naalakkersuisut inatsit malillugu sulinertik ingerlassimavaat?

Inuiaqatigiit akileraarutitigut mamianartumik eqqornerlunneqarnernut tunngatillugu Akileraarnermut Aqutsisoqarfimmut paasiniaasoqaraanga ersarissumik akissutissaqartoqarneq ajorpoq, sunarpiaq kukkuluttussutigineqarsimanersoq.

Inuiaqatigiit taama amerlatigisut eqqornerlunneqarnerannut kina kukkuluttortoqarsimaneranut akisussaasuua?

Suliaq naatsumik

- Innuttaasut 6.828-t soraarnerusutisiaqarnissamut aaqqissuussinermut peqataasussaatitaanermut akiliisarsimanngillat. Taamammat Akileraartarnermut Aqutsisoqarfik aningaasanik amigaataasunik akiliisitsiniarpoq.

- Tassa imaappoq innuttaasut 6.628-t inatsit malillugu soraarnerusutisiassanut nammineq katersisussaatitaanermut akiliiniassammata taakku ukioq manna akileraaruteqarnerusariaqarput.

- Innuttaasut qanoq aningaasarsiaqartiginerat apeqqutaalluni 2 procentip 6 procentillu akornanni akileraarnerutinneqassapput.

- Soraarnerusutisiaqalernissamut aaqqissuussamut peqataasussaatitaaneq januaarip aallaqqaataat, 2018-imi atuutilerpoq, Namminersorlutik Oqartussalli Akileraartarnermut Aqutsisoqarfillu akileraarutip procentiata qaffanneratigut soraarnerussutisiassanut aatsaat ukioq manna akiliisitsipput.


Tigusiffik: KNR

Aningaasaqarnermut Naalakkersuisoq, Vittus Qujaukitsoq (NQ) Aningaasaqarnermut Akileraartarnermullu Ataatsimiititaliamit ilaatigut apeqqutinit 41-sunit taama apeqqarissaarfigineqarpoq.

Aningaasaqarnermut Akileraartarnermullu Ataatsimiititaliami siullermeersumik ammasumik siunersiuisoqarnerani pingaarnertut Aningasaqarnermut Naalakkersuisoq, Vittus Qujaukitsoq aggersarneqarpoq. Aggersaanermilu soraarnerussutisiaqarnissamut pinngitsoorani aaqqissuussinermut tunngassuteqartumik apeqquterpassuarnik akissuteqartinneqarpoq. 

Kukkuluttornerit ajuusaarutigaakka

Suliaq taanna innuttaasunut 6.628-nut, soraarnerussutisiaqalernissamut peqataasussaatitaanermi naammattunik akiliuteqarsimanngitsunut tunngavoq. Taamaammallu Akileraartarnermut Aqutsisoqarfimmit akiligassanik qaffaanermik kinguneqartitsipput. Pisortanillu kukkuluttuttoqarsimanera Vittus Qujaukitsumit nassuerutigineqarpoq, kisimilu akisussaannginnerarpoq.

AAMMA ATUARUK Soraarnerussutisiassanik katersinngitsoorneq: Allakkat tigusisussanut apuutinngitsut

- Akileraarutit qarasaasiatigut atortutigut kukkuluttortoqarneranik kukkusamik anillatsinneqarsimapput. Tamatuma saniatigut sulisitsisut eqqortunik nalunaaruteqarsimannginneranik aamma aallaaveqarpoq, Vittus Qujaukitsoq erseqqissaavoq.

- Tamannalu soorunami ajuusaarnarpoq, aamma ilinniutigissavarput.

AAMMA ATUARUK Soraarnerussutisiaqalernissamut aaqqissuussaq pillugu paasissutissiinerusinnaagaluartik naalakkersuisoq nassueruteqarpoq

Soraarnerussutisiaqarnissamut pinngitsoorani aaqqissuussinermut tunngatillugu paasissutissat innuttaasunit kattuffinnillu naammaginngitsutut nalilerneqarlutik isornartorsiorneqangaatsiarnikuupput. Arlallimmi isumaqarput akileraartarnermut allannguutissat ersarissumik innuttaasunut ilisimatitsissutigineqarsimanngitsut, aatsaallu ukiortaami akileraartarnermut allagartat nassiussuuneqarnerisigut innuttaasut ilaannit paasineqarlutik. Tamannalu isiginnaarutikkut tusarnaarutikkullu nittarsaanneqarnerusariaqaraluartoq aamma Naalakkersuisoq taamani isummerpoq.

- Paasititsiniaanermut tunngatillugu suliniutit ilaat pitsaanerusinnaagaluartut isumaqarpunga, kisianni paasititsiniaaneq ataatsimut isigalugu ajorisassaanngillat, assersuutigalugu 2018-imi 2019-imilu paasititsiniaasoqareernikuuvoq.

Mamiasunneq

Innuttaasut soraarnerussutisiaqarnissamut pinngitsoorani aaqqissuussinermi peqarnissaanut tunngatillugu Akileraartarnermut Aqutsisoqarfimmut sianerlutik paasiniaagaangamik ersarissumik akineqarsinnaasannginnerannut tunngatillugu, Inuit Ataqatigiinneersup, Muté Bourup Egedep mamianartutut taavaa.

Mamianartutullu taaneqarnera Vittus Qujaukitsumit isumaqataaffigineqanngilaq.

- Ajornartorsiutaareersut ajornersulerteqqissanngikkivut isumaqarpunga, taanna oqarpoq.

Muté Bourup Egedelli isummani allanngortinngilaa.

- Mamianartuuvoq, mamianartuuvoq innuttaasut paatsuungallutik Akileraartarnermut Aqutsisoqarfimmut apersuigaluarlutik akineqarsinnaanngitsut.

Tassungalu Partii Naleqqameersoq, Jens Napaattooq siunnersiuinermi oqarasuaatikkut peqataasoq akuliuppoq.  

- Mamiasunnermii ajunaarnersuartut taarusunneruara, taanna oqarpoq.

Apeqqutini 41-sunit ilaatigut uku apeqqutigineqarput:

  • Inatsimmi pingaarnertut imarisat tunngavissiisutut malinneqartutullu Naalakkersuisunut isigineqapat?
  • Suliap ingerlanerani tamarmi inatsimmi malittarisassiissutaasut naapertorlugit Naalakkersuisunit inatsit malinneqarpa?
  • Inatsimmik atorunnaarsitsineq qanoq pisortanut, innuttaasunut inuussutissarsiutilinnullu ingerlatsisunut allaffissornikkut aningaasaqarnikkullu kinguneqassava?
  • Inuit 6.600-it suliamit matuminnga eqqorneqartut ilaaq qassit pisup siulianili pisortanut qassit akiitsoqareertuppat?
  • Suliaq saqqummermat ilaatigut Aningaasaqarnrmut Aatsitassanullu Naalakkersuisoq allagarpassuarnik Akieraartarnermut Aqutsisoqarfimmit nassiunneqarsimasunik utertinneqarsimasunillu Qanoruukkut takutitsisoq takuneqarsinnaasimavoq. Utertitsinerit taakku qanga aallartippat inuillu eqqorneqartut allakkat imarisaat pillugit paasitinniarlugit iliuutsinik sunik aallartitsisoqarpa?

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat